Avval xabar berganimizdek, Qozog‘iston prezidenti Qosim-Jo‘mart To‘qayev 15 aprel kuni Ko‘ksaroyda rasmiy kutib olindi.

Foto: Prezident matbuot xizmati

Ushbu marosimdan so‘ng davlat rahbarlari tor doirada uchrashuv o‘tkazdi.

Foto: Prezident matbuot xizmati

Shavkat Mirziyoyev Qozog‘iston rahbarini O‘zbekistonga tashrifi bilan qutlab, bu keyingi yillarda ancha faollashgan siyosiy muloqotlarning izchil davomi ekanini ta’kidladi.

— Qozog‘iston Respublikasi prezidenti sifatida ilk davlat tashrifingizni O‘zbekistonga amalga oshirganingizni yuqori baholaymiz. Buni mamlakatlarimiz o‘rtasidagi strategik sheriklikni yanada mustahkamlashga qat’iy intilish ifodasi deb bilamiz. Qozog‘iston biz uchun yaqin qo‘shni, strategik sherik. Hamkorligimizning barcha yo‘nalishlari bo‘yicha ijobiy dinamikaga erishilayotganidan mamnunmiz, — dedi Shavkat Mirziyoyev.

Foto: Prezident matbuot xizmati

Qozog‘iston prezidenti O‘zbekistonga taklif uchun davlat rahbariga minnatdorlik bildirib, muzokaralar samarali o‘tishiga ishonishini qayd etdi.

— Mamlakatlarimiz o‘rtasidagi hamkorlik sifati va amaliy mazmuni haqidagi gaplaringizga to‘la qo‘shilaman. Siz, hurmatli Shavkat Miromonovich, va Qozog‘istonning birinchi prezidenti Nursulton Nazarboyev davlatlararo munosabatlarni yuqori bosqichga olib chiqdingiz. Bu sur’atni saqlab qolishni o‘zimning asosiy vazifam deb bilaman. Qozog‘istonda qardosh O‘zbekiston bilan aloqalarga talab juda katta, — dedi Qosim-Jo‘mart To‘qayev.

Foto: Prezident matbuot xizmati

Uchrashuvda mamlakatlar o‘rtasidagi do‘stlik va yaxshi qo‘shnichilik munosabatlarini yanada mustahkamlash, savdo, transport, sanoat kooperatsiyasi, turizm va boshqa sohalardagi hamkorlikni rivojlantirish istiqbollari muhokama qilindi, tomonlarni qiziqtirgan mintaqaviy va xalqaro ahamiyatga molik masalalar yuzasidan fikr almashildi.

Mintaqada tinchlik va xavfsizlikni mustahkamlash, Afg‘onistondagi vaziyatni tinch yo‘l bilan hal etishga ko‘maklashish masalalariga ham e’tibor qaratildi.