Buxorolik haydovchining xonadoniga yuborilgan 1 milliard 13 million 652 ming 19 so‘m miqdoridagi jarima haqidagi ogohlantirish xati blankaga elektron kiritishda texnik xatolikka yo‘l qo‘yilgan. Bu haqda Buxoro viloyat IIB YHXB matbuot xizmati “Daryo”ga ma’lum qildi.

Foto: Bukhara info

Aniqlanishicha, 25-mart kuni Buxoro shahrida istiqomat qiluvchi U.M.ga 1 milliard 13 million 652 ming 19 so‘m miqdorida jarima to‘lash to‘g‘risida ogohlantirish xati kelgan. U.M. Lacetti rusumidagi transport vositasini boshqarib, transport vositalarini quvib o‘tish qoidalarini buzgan va bu bilan Ma’muriy javobgarlik to‘g‘risidagi kodeksning 128-moddasi 1-qismida nazarda tutilgan huquqbuzarlik holatini sodir etgan. Bunga ko‘ra, haydovchi tomonidan sodir etilgan huquqbuzarlik holati uchun u eng kam ish haqining yarmi — 101 365 so‘m miqdorida jarima to‘lashi lozim.

Buxoro shahar IIB Yo‘l harakati xavfsizligi boshqarmasi inspektori haydovchining ushbu qoidabuzarligi uchun unga nisbatan KV 18028702850-raqamli Jarima solish to‘g‘risida qaror chiqargan. Ma’muriy javobgarlik to‘g‘risidagi kodeksning 248, 304, 306 va 307-moddalariga asoslangan holda blankada chiqarilgan qarorda Lacetti haydovchisiga nisbatan 1 013 652 019 so‘m miqdoridagi jarima jazosi summasi raqam va so‘z bilan yozilgan.

Ogohlantirish xati blankada qanday yozilgan bo‘lsa, shunday holatda fuqaro U.M. xonadoniga borgan. Viloyat IIB YHXB matbuot xizmatining ma’lum qilishicha, haydovchi ushbu blankada ko‘rsatilgan jarima miqdorining tegishli organdan to‘g‘ri yoki noto‘g‘ri ekanligini surishtirmay turib, o‘z tanishlari orqali Telegram messenjeridagi kanal va guruhlarga joylashtirgan. Blankaning ijtimoiy tarmoqlarga tarqalishini ta’minlagan haydovchiga tushunchalar berildi.

— Huquqbuzarlik holatini sodir etgan haydovchiga nisbatan jarima solish to‘g‘risida chiqarilgan ushbu qaror viloyat IIB ma’muriy amaliyot bo‘limi boshlig‘i tomonidan tahliliy o‘rganildi. Unga ko‘ra, IIB yo‘l harakati xavfsizligi boshqarmasi inspektori tomonidan rasmiylashtirilayotgan vaqtda hujjat texnik xato tufayli jarima summasi sana bilan qorishib, avtomatik tarzda yaxlit miqdorga aylanib qolgan. Texnik xato o‘z vaqtida bartaraf etildi. Qoidabuzar haydovchi esa qonunda belgilangandek jarima miqdorini to‘ladi, — deyiladi Buxoro viloyati IIB YHXB matbuot xizmati xabarida.