Toshkentda 26—30-mart kunlari bo‘lib o‘tgan Uzbekistan fashion week moda haftaligining ilk kunida o‘tkazilgan Ikat namoyishida o‘zbek va xorijiy dizaynerlar o‘zlarining ushbu matodan foydalangan holda yaratgan liboslarini taqdim etdi. Bu haqda “Myday.uz” xabar berdi.
Ikat namoyishi butun respublikani qamrab oldi desak mubolag‘a bo‘lmaydi. O‘z liboslar kolleksiyasi bilan ishtirok etgan dizaynerlar O‘zbekistonning turli viloyatlaridan tashrif buyurgan bo‘lib, har biri o‘z viloyatiga xos bo‘lgan xususiyatlarni inobatga olib liboslar to‘plami yaratgan.
Shuningdek, tadbirga tashrif buyurgan mehmonlar xorijiy dizaynerlarning ham Ikat matosidan yaratgan betakror liboslariga guvoh bo‘lgan.
ANOR, KAMILA MI o‘zbek brendlari, shuningdek, Nazgul Kaarova (Qirg‘iziston), Murod Boboqulov (Tojikiston), Jozefin Von Klitzing (Fransiya) va boshqalarning liboslar to‘plamlari moda ixlosmandlarini o‘ziga maftun qilgan.
Taniqli o‘zbek dizayneri Shahzoda Muhammedova ham mazkur namoyishda o‘zining ikkita liboslar to‘plami bilan qatnashgan. Birinchisi oq-qora ranglardan foydalangan holda, milliy matolardan yaratilgan “Do‘ppi” kolleksiyasi bo‘lib, dizayner o‘tgan yili mazkur to‘plami uchun Moskvada bo‘lib o‘tgan moda festivalida g‘olib bo‘lgan.
Ikkinchi kolleksiya yaqindagina Moskvada bo‘lib o‘tgan Xalqaro moda festivali uchun yaratilgan liboslar to‘plamidir. Mazkur to‘plamda dizayner atlas matosidan ustki kiyim-bosh yaratgan bo‘lib, ularga mos ravishda o‘zbek ajdodlari surati tushirilgan svitshotlar ham tikilgan. Qayd etish joiz, aynan shu to‘plami bilan dizayner Xalqaro moda festivalida g‘oliblikni qo‘lga kiritgan.
Izoh (0)