Qoraqalpog‘istonlik yigit qabristonda sevgilisi va o‘zini pichoqladi
Qoraqalpog‘istonning Qonliko‘l tumanida 24 yoshli Sh.Kengesbayev boshqaga turmushga chiqqan 21 yoshli sobiq sevgilisi D.Koptleuva va o‘zini pichoqladi, deb xabar berdi “Gazeta.uz”.
Hodisa 1-mart kuni soat 19:30 larda “Yeshimoxun” qabristonida sodir bo‘lgan.
Xabarda aytilishicha, yigit dastlab sevgilisiga oshxona pichog‘i bilan bir necha marotaba tan jarohati yetkazgan.
So‘ngra o‘zining qorin qismiga bir necha marotaba urib, bo‘yin va bilak qon tomirlarini kesgan va akasi A.Abdimuratovga qo‘ng‘iroq qilib, holat haqida xabar bergan.
Suiqasd natijasida D.Koptleuova tuman tibbiyot birlashmasiga olib kelinayotganda vafot etgan, Sh. Kengesbayev jonlantirish bo‘limiga yotqizilgan.
Ushbu holat yuzasidan 1 mart kuni Qonliko‘l tuman prokuraturasi tomonidan JKning 97-moddasi (qasddan odam o‘ldirish) 1-qismi bilan jinoyat ishi qo‘zg‘atilib, tergov harakatlari Qoraqalpog‘iston prokuraturasi o‘ta og‘ir jinoyatlarni tergov qilish bo‘limi tomonidan olib borilmoqda.
Jinoyat ishi bo‘yicha 16 mart kuni Sh. Kengesbayev gumon qilinuvchi tariqasida jalb qilinib, unga nisbatan jinoyat ishlari bo‘yicha Qonliko‘l tuman sudining ajrimi bilan qamoq ehtiyot chorasi qo‘llanilgan.
Ish bo‘yicha guvoh tariqasida so‘roq qilingan A.Abdimuratov 1-mart kuni soat 19:40 larda qo‘ng‘iroq qilib, akasining o‘g‘li Shinbergen unga: “Arslon aka meni kechiring, qizni pichoqlab qo‘ydim. Ikkalamizni shu yerga ko‘ming”, — deb aytganligi haqida ko‘rsatma bergan.
Mazkur jinoyat ishi bo‘yicha gumon qilinuvchi tariqasida so‘roq qilingan Sh. Kengesbayev o‘z ko‘rsatuvida 2016-yildan buyon D.Koptleuova bilan gaplashib, sevishib yurganini ma’lum qilgan. U 2019-yil yanvar oyida Toshkent shahriga ishlash uchun ketib, 27-fevral kuni qaytib kelgan. D.Koptleuova bilan telefon orqali gaplashganida, uning Qonliko‘l tumanida yashovchi S.Kuralbayevga turmushga chiqqanini eshitib, jahli chiqadi.
1-mart kuni D.Koptleuova Nukus shahridan Qonliko‘l tumaniga kelganida uni kutib oladi va birgalikda Qo‘ng‘irot tumaniga borib, bozordan yangi pichoq sotib oladi. So‘ngra ikkisi o‘z jonlariga qasd qilish maqsadida birgalikda Qonliko‘l tumani “Beshko‘pir” OFY Joliy qishlog‘i hududidagi “Yeshimoxun” qabristoniga boradi. Yigitning aytishicha, avvaliga D.Koptleuova o‘ziga o‘zi pichoq uradi. Bu vaqtda u ko‘zini yumib turadi. Shundan so‘ng uning qo‘lidan pichoqni olib, o‘ziga uradi.
Ayni vaqtda ish bo‘yicha sud kriminalistika, daktiloskopiya, biologiya, statsionar psixiatriya ekspertizalari tayinlangan.
