Turkiyaning Konya shahridagi Selchuk universiteti (Selçuk Üniversitesi)da “Ikki qardosh davlat: Turkiya-O‘zbekiston va ularning kelgusi munosabatida mening o‘rnim” mavzuida anjuman bo‘lib o‘tdi, deb xabar berdi “Azon.uz”.
O‘zbekiston Yoshlari Umumjahon assotsiatsiyasi Turkiya vakilligi tashabbusi va O‘zbekistonning Turkiyadagi elchixonasi, Xorijiy turklar va qardosh xalqlar davlat boshqarmasi, Selchuk universiteti, Selchuk tuman hokimiyati va boshqa tashkilotlar ko‘magida tashkil qilingan tadbirga Turkiyaning turli universitetlarida ilmiy tadqiqot olib borayotgan doktorantlar jalb qilindi.
Turkiyaning turli universitetlarida ilmiy tadqiqot olib borayotgan o‘zbekistonlik doktorantlar o‘z tadqiqoti yuzasidan ma’ruza qildi.
Ishtirokchilarning turk tili va adabiyoti, tarix, falsafa, siyosat, sohalararo tadqiqotlar kabi yo‘nalishlar bo‘yicha chiqishlari ishtirokchilarda katta qiziqish uyg‘otdi. Ma’ruzalar muhokamasidan so‘ng “Kelajakka oid loyihalar” mavzuida yig‘ilish bo‘lib o‘tdi. Yoshlar ikki davlat munosabatlarini rivojlantirish borasidagi loyihalari, rejalari va fikrlari bilan o‘rtoqlashdi. Muvaffaqiyatli deb topilgan loyihalarni amalga oshirish bo‘yicha aniq rejalar tuzildi.
Ma’lumot o‘rnida aytib o‘tish joiz, hozirgi kunda Turkiya Respublikasi universitetlarida 1000 nafarga yaqin o‘zbekistonlik talabalar turli yo‘nalishlarda tahsil olmoqda. Mazkur ko‘rsatgich yil sayin ortayotir. Doktorantura yo‘nalishida tadqiqot olib borayotganlar soni esa 40 dan oshadi. Bundan tashqari, Turkiyada doktorlik unvonini qo‘lga kiritib, shu yerdagi ta’lim muassasalarida dars berib kelayotgan o‘zbekistonliklar ham mavjud. Tashkil etilgan tadbir yoshlarni ilmiy faoliyatga jalb qilish, tadqiqot mobaynida o‘zaro hamkorlik qilishga hissa qo‘shishi bilan ahamiyatlidir.
O‘zbekistonlik doktorantlarning keyingi konferensiyasi joriy yilning kuz oyida Turkiyaning Izmir shahrida o‘tkazilishi belgilandi.
Izoh (0)