Ispaniya Kubogi. “Real” yutqazdi, ammo keyingi bosqichga chiqdi, “Atletiko” esa musobaqani tark etdi

16-yanvar, chorshanba kuni futbol bo‘yicha Ispaniya Kubogining 1/8 finali bosqichi doirasida 3 ta javob uchrashuvi bo‘lib o‘tdi.

Diyego Simyone boshqaruvidagi “Atletiko” klubi o‘z uyida “Jirona” jamoasini qabul qildi. O‘yin 3:3 hisobida yakuniga yetdi.

Bellashuvning 12-daqiqasida Nikola Kalinich Diyego Godin uzatmasini golga aylantirdi va hisobni ochdi (1:0). 37-daqiqaga kelib, Valeri Fernandes madridliklar darvozasiga gol urdi va hisobni tenglashtirdi (1:1).

2-bo‘limning 59-daqiqasida mehmon jamoa a’zosi Kristian Stuani jamoasining ikkinchi goliga mualliflik qildi. Oradan 7 daqiqa o‘tib, Anhel Korrea hisobni 2:2 ko‘rinishiga olib keldi. 84-daqiqada Antuan Grizmann raqib darvozasini ishg‘ol qilgan bo‘lsa, 88-daqiqada “Jirona” klubi hujumchisi Seydu Dumbiya jamoasini mag‘lubiyatdan qutqarib qoldi (3:3).

2 ta o‘yin natijasiga ko‘ra “Jirona” mehmonda urilgan gollar evaziga musobaqaning yarim finali yo‘llanmasini qo‘lga kiritdi.

“Sevilya” o‘z maydonida “Atletik Bilbao” klubiga kichik hisobda mag‘lub bo‘ldi (0:1). Yagona kiritilgan golga “Atletik” jamoasi hujumchisi Gorka Guruzeta mualliflik qildi (77).

Shunga qaramay, “Sevilya” ikki o‘yin natijasiga ko‘ra “Atletik Bilbao” ustidan 3:2 hisobida g‘alaba qozondi va musobaqaning 1/4 finaliga yo‘l oldi.

Javob uchrashuvida Madridning “Real” klubi “Leganes” uyiga safar qildi. Dastlabki o‘yinda yirik hisobda (3:0) g‘alaba qozongan madridliklar 0:1 hisobida mag‘lubiyatga uchradi. “Leganes” hujumchisi Martin Breytueyt 30-daqiqada Keylor Navas darvozasini ishgol qildi.

“Qirollik klubi” umumiy hisobda “Leganes”ni yengdi (3:1) va musobaqaning navbatdagi bosqichiga yo‘l oldi.