Umumxitoy do‘stlikka ko‘maklashish assotsiatsiyasi raisi Chen Chjimin boshchiligidagi delegatsiya O‘zbekistonga keldi. Bu haqda O‘zA xabar berdi.
Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasida 17-dekabr kuni delegatsiya a’zolari bilan uchrashuv bo‘lib o‘tdi.Uchrashuvda 2019-yilga mo‘ljallangan hamkorlik, uning doirasida kiberxavfsizlik sohasida ekspertlar almashish, xalq diplomatiyasi va jamiyatda millatlararo totuvlikni ta’minlash bo‘yicha malaka oshirishni tashkil etish masalalari muhokama qilindi.
Toshkent viloyati hokimi G‘ulomjon Ibragimov bilan uchrashuvda “Bir makon, bir yo‘l” loyihasi doirasida hamkorlikda yaratilayotgan yangi imkoniyatlar yuzasidan fikr almashildi.
Chen Chjimin Toshkent viloyati Buyuk ipak yo‘li shaharlari uyushmasiga to‘la huquqli a’zo sifatida qabul qilinganini ta’kidladi. Ushbu uyushma Buyuk ipak yo‘li bo‘ylab joylashgan 43 xorijiy shahar va viloyat hamda Xitoyning 6 shahridan iborat. Viloyat rahbariyatiga tegishli sertifikat topshirildi.
Toshkent shahri hokimligida bo‘lib o‘tgan muloqotda birodar shaharlar — Toshkent va Shanxay o‘rtasida 25 yildan buyon davom etayotgan muvaffaqiyatli hamkorlik xususida so‘z yuritildi. Ushbu sanani nishonlash doirasida qator madaniy tadbirlar uyushtirish rejalashtirilgan. Toshkent shahar hokimligiga ham Buyuk ipak yo‘li shaharlari uyushmasining sertifikati topshirildi. Ikki tomonlama hamkorlik masalalari va istiqbollari muhokama qilindi.
Delegatsiya a’zolari Prezident maslahatchisi, Davlat boshqaruvi akademiyasi rektori Rustam Qosimov bilan ham uchrashdi.
Izoh (0)