Fyodor Andreyevich Maxnovni o‘z vaqtida deyarli butun dunyo tanigan. U dunyodagi eng baland odam bo‘lgan. Vazni 182 kilogramm, bo‘yining uzunligi esa 285 santimetr bo‘lgan erkakning etigiga 12 yoshli bola bemalol joylasha olgan, deb yozadi Big Picture.

Fyodor Maxnov 1878-yilning 6-iyunida hozirgi Belorus hududida nochor oilada tug‘ilgan. Maxnovning oilasi a’zolarining bo‘yi o‘rtachadan uzun bo‘lgan. Fyodorning onasi bolaning juda katta bo‘lganligi sababli tug‘riq vaqtida vafot etgan. Bolaning tarbiyasi bilan bobosi shug‘ullangan.

Dastlab Fyodor boshqa bolalar kabi rivojlangan, biroq sakkiz yoshga kelib, u tez o‘sa boshlagan. 12 yoshga kirganda uning bo‘yi ikki metrga yetgan. Oyoq kaftining uzunligi 51 santimetrni, qo‘l kaftiniki esa 32 santimetrni tashkil qilgan. Uning kuchi bo‘yiga mos bo‘lgan, u katta odamni hech qiyinchiliksiz ko‘tara olgan, pichan ortilgan aravani esa tepalikka chiqara olgan.

Fyodor 14 yoshga to‘lganda uning noodatiy bo‘yi sababli uyni qayta qurishga to‘g‘ri kelgan. Bolalar uning ustidan baland bo‘yi sababli kulgan, javob tariqasida Fyodor ularning bosh kiyimini tomga ilib qo‘ygan.

Kunlarning birida ko‘chma sirk egasi Otto Bidinder Fyodorni bozorda ko‘rib qolgan. O‘smir buyurtma asosida tikiladigan kiyimlari uchun pul ishlayotgan bo‘lgan. O‘sha vaqtda noodatiy kishilar juda ommabop hisoblangan, shuning uchun Otto Fyodorning qarindoshlarini uni Germaniyaga yuborishga ko‘ndirgan.

Dastlab Fyodor nemis tilini va sirk san’atini o‘rgangan. O‘smir 16 yoshida sirkda ishlash uchun shartnoma tuzgan. Fyodor kaftining yoni bilan g‘ishtlarni sindirgan, taqani to‘g‘rilay olgan, yotgan holda kichik orkestr bo‘lgan platformani ko‘tara olgan. Biroq odamlar asosan haqiqiy bahaybat odamni o‘z ko‘zi bilan ko‘rish uchun kelgan. Maxnov 25 yoshga kirganda, uning bo‘yi 285 santimetrga yetgan.

Uning ovqatlanishi ham o‘lchamlariga muvofiq bo‘lgan. Nonushtaga u 20 ta tuxumdan tayyorlangan quymoq, sakkizta non yegan va ikki litr choy ichgan. Tushlikka — 2,5 kilogramm go‘sht va shuncha kartoshka. Maxnov 24 soatdan ko‘proq uxlay olgan.

Maxnov sirkda to‘qqiz yil ishlagan va boy odamga aylangan. XX asrning boshida u o‘z vataniga qaytgan va yer sotib olib, o‘ziga mos uy qurgan. Maxnov Bidinder bilan umrining oxirigacha do‘stona munosabatni saqlab qolgan.

O‘zining yaxshi moddiy holati va xarakteriga qaramasdan, Fyodor uzoq vaqt davomida juft topa olmagan. Oxir-oqibat u qishloq o‘qituvchisi Yefrosinya Lebedovaga uylangan. Qizning bo‘yi o‘rtachadan baland, biroq turmush o‘rtog‘inikidan roppa-rosa bir metrga past bo‘lgan. Fyodorning rafiqasi besh nafar farzandni dunyoga keltirgan.

Fyodor Maxnov 1912-yilda 34 yoshida vafot etgan. O‘limining aniq sababi ma’lum emas.