Фёдор Андреевич Maxновни ўз вақтида деярли бутун дунё таниган. У дунёдаги энг баланд одам бўлган. Вазни 182 килограмм, бўйининг узунлиги эса 285 сантиметр бўлган эркакнинг этигига 12 ёшли бола бемалол жойлаша олган, деб ёзади Big Picture.
Фёдор Maxнов 1878 йилнинг 6 июнида ҳозирги Белорус ҳудудида ночор оилада туғилган. Maxновнинг оиласи аъзоларининг бўйи ўртачадан узун бўлган. Фёдорнинг онаси боланинг жуда катта бўлганлиги сабабли туғриқ вақтида вафот этган. Боланинг тарбияси билан бобоси шуғулланган.
Дастлаб Фёдор бошқа болалар каби ривожланган, бироқ саккиз ёшга келиб, у тез ўса бошлаган. 12 ёшга кирганда унинг бўйи икки метрга етган. Оёқ кафтининг узунлиги 51 сантиметрни, қўл кафтиники эса 32 сантиметрни ташкил қилган. Унинг кучи бўйига мос бўлган, у катта одамни ҳеч қийинчиликсиз кўтара олган, пичан ортилган аравани эса тепаликка чиқара олган.
Фёдор 14 ёшга тўлганда унинг ноодатий бўйи сабабли уйни қайта қуришга тўғри келган. Болалар унинг устидан баланд бўйи сабабли кулган, жавоб тариқасида Фёдор уларнинг бош кийимини томга илиб қўйган.
Кунларнинг бирида кўчма цирк эгаси Otto Бидиндер Фёдорни бозорда кўриб қолган. Ўсмир буюртма асосида тикиладиган кийимлари учун пул ишлаётган бўлган. Ўша вақтда ноодатий кишилар жуда оммабоп ҳисобланган, шунинг учун Otto Фёдорнинг қариндошларини уни Германияга юборишга кўндирган.
Дастлаб Фёдор немис тилини ва цирк санъатини ўрганган. Ўсмир 16 ёшида циркда ишлаш учун шартнома тузган. Фёдор кафтининг ёни билан ғиштларни синдирган, тақани тўғрилай олган, ётган ҳолда кичик оркестр бўлган платформани кўтара олган. Бироқ одамлар асосан ҳақиқий баҳайбат одамни ўз кўзи билан кўриш учун келган. Maxнов 25 ёшга кирганда, унинг бўйи 285 сантиметрга етган.
Унинг овқатланиши ҳам ўлчамларига мувофиқ бўлган. Нонуштага у 20 та тухумдан тайёрланган қуймоқ, саккизта нон еган ва икки литр чой ичган. Тушликка — 2,5 килограмм гўшт ва шунча картошка. Maxнов 24 соатдан кўпроқ ухлай олган.
Maxнов циркда тўққиз йил ишлаган ва бой одамга айланган. ХХ асрнинг бошида у ўз ватанига қайтган ва ер сотиб олиб, ўзига мос уй қурган. Maxнов Бидиндер билан умрининг охиригача дўстона муносабатни сақлаб қолган.
Ўзининг яхши моддий ҳолати ва характерига қарамасдан, Фёдор узоқ вақт давомида жуфт топа олмаган. Охир-оқибат у қишлоқ ўқитувчиси Ефросиня Лебедовага уйланган. Қизнинг бўйи ўртачадан баланд, бироқ турмуш ўртоғиникидан роппа-роса бир метрга паст бўлган. Фёдорнинг рафиқаси беш нафар фарзандни дунёга келтирган.
Фёдор Maxнов 1912 йилда 34 ёшида вафот этган. Ўлимининг аниқ сабаби маълум эмас.
Изоҳ (0)