Jizzax viloyatida O‘zbekiston Respublikasi Investitsiyalar bo‘yicha davlat qo‘mitasi tomonidan tegishli vazirlik va idoralar hamkorligida tashkil etilgan xalqaro investitsiyaviy forumda dunyoning 30 ga yaqin davlatidan farmasevtika, yengil sanoat, elektrotexnika, qurilish mahsulotlari ishlab chiqarish, avtomobilsozlik, neftni qayta ishlash, qishloq xo‘jaligi sohalarida faoliyat yurituvchi korxonalar vakillari qatnashdi. Bu haqda O‘zA xabar berdi.
O‘zA muxbiri forum ishtirokchilarining fikrlari bilan qiziqdi.
Mazkur forum men uchun foydali hamkorlik loyihalariga boy bo‘ldi. O‘tgan yili Toshkentda dori vositalari ishlab chiqarishga ixtisoslashgan korxona faoliyatini yo‘lga qo‘ygan edik. Tadbir doirasida Jizzaxning iqtisodiy imkoniyatlari, “Zomin farm” erkin iqtisodiy zonasidagi sharoit va imkoniyatlar haqida ma’lumotga ega bo‘lgach, navbatdagi ana shunday quvvatni shu yerda ishga tushirish niyati tug‘ildi. Hamkorlarimiz bilan maqsadimizni amalga oshirishning aniq rejalarini muhokama qilish imkoniyatiga ega bo‘lganimizdan xursandmiz.O‘zbekistonda ishbilarmonlar uchun keng imkoniyatlar yaratilganini qayd etishni istardim. Ayniqsa, so‘nggi ikki yilda sarmoyadorlar faoliyati uchun to‘siq bo‘layotgan ko‘plab muammolar o‘z yechimini topdi. Jumladan, O‘zbekistonda tadbirkorlik faoliyatini yo‘lga qo‘yish tartiblari soddalashtirildi, imtiyozlar yaratildi. Imkoni bo‘lsa, jahondagi barcha ishbilarmonlarni O‘zbekistonga taklif qilgan bo‘lardim.
Ashok Kumar, “Shayana farm” kompaniyasi bosh direktori (Hindiston)
Mamlakatingizda yaratilgan qulay ishbilarmonlik muhiti nafaqat O‘zbekiston, balki Markaziy Osiyodagi barcha davlatlar bilan iqtisodiy aloqalarni yanada mustahkamlashning muhim omiliga aylandi. Biz Amerika, Yevropa va Afrika davlatlarida muqobil energiya uskunalari ishlab chiqaruvchi korxonalar faoliyatini yo‘lga qo‘yganmiz. Muqobil energiyaga bo‘lgan talab dunyo miqyosida ortib borayotgani va Jizzaxda ushbu yo‘nalishdagi zamonaviy texnologiyalarni ishlab chiqarish va o‘rnatishda katta salohiyat mavjudligini inobatga olsak, hududda quyosh batareyalarini ishlab chiqaruvchi korxona faoliyatini yo‘lga qo‘yishimiz maqsadga muvofiq. Tadbirda faoliyatimizning asosi bo‘ladigan dastlabki loyihalar haqida fikrlashdik. Yaqin kelajakda istiqbolli sheriklik munosabatlarini amalga oshirishga umid qilamiz.
Murat O‘zturk, tadbirkor (Turkiya)
O‘zbekistonda avtoklav gazobeton bloklari tayyorlovchi korxona tizimini ishga tushirish ustida ish olib borayapmiz. Qiymati 130 million AQSh dollariga teng bo‘lgan ushbu loyiha nemis, turk va o‘zbek ishlab chiqaruvchilari hamkorligida amalga oshirilmoqda. Dastlab beshta ana shunday korxona faoliyatini yo‘lga qo‘yamiz. Keyingi bosqichda korxonalar sonini 12 taga yetkazish, ya’ni yurtingizning har bir hududida sanoat quvvatlari qurish rejalashtirilgan. Uy-joy qurilishida keng qo‘llaniladigan bu material o‘zining mustahkamligi, issiq-sovuqqa bardoshli ekani, haroratni bir me’yorda ushlab tura olishi kabi qator afzalliklarga ega. Bu esa isitish uchun sarf bo‘ladigan elektr energiyasi va tabiiy gazni tejash imkonini beradi. O‘zbekiston, xususan, Jizzax ham mahsulot ishlab chiqarilishida ishlatiladigan xomashyo — qum, sement va ohaktosh zaxirasiga boy. Xalqaro anjuman doirasida faoliyatimiz uchun zarur bo‘ladigan ko‘plab ma’lumotlarga ega bo‘ldim.
Klaus Bonemann, Wehrhahn GmbH kompaniyasi prezidenti (Germaniya)
Izoh (0)