Matbuot va axborot agentligi ma’lumolariga qaraganda, 7-avgust kuni Andijonda, 8-avgustda Namanganda “Aziz va yagonamsan, jonajon O‘zbekistonim!” shiori ostida o‘tkazilgan “Eng ulug‘, eng aziz” an’anaviy tanlovining viloyat bosqichi g‘oliblarini taqdirlash marosimi bo‘lib o‘tdi.
Tanlovga yozuvchi, shoir, jurnalistlar, tasviriy va kino san’ati namoyandalari, foto va dizayn ustalari tomonidan “Aziz va yagonamsan, jonajon O‘zbekistonim!” g‘oyasini aks ettirgan asarlar taqdim etilgan.
Tanlovning Andijon viloyati bosqichida adabiyot yo‘nalishida shoir Farid Usmon birinchi, yozuvchi Omina Tojiboyeva ikkinchi, shoira Munavvara Tillaboyeva uchinchi o‘rinni egalladi.
Jurnalistika yo‘nalishida “Andijonnoma” gazetasi bo‘lim boshlig‘i Akbarjon Nazarov birinchi, “Andijon tongi” gazetasi tahririyati ikkinchi, “Vodiy gavhari” jurnali uchinchi o‘ringa loyiq topildi.
Televideniye yo‘nalishida Andijon viloyat teleradiokompaniyasining “Andijon axboroti” ko‘rsatuvi ijodiy jamoasi birinchi, “Yoshlar” teleradiokanali tasvirchisi O‘tkirbek O‘zganov ikkinchi, ATV maxsus muxbiri Elmira Rahmonova uchinchi o‘rinni egalladi.
Foto va dizayn yo‘nalishida Temurmalik Abdullayev birinchi, Azizbek Jabborov ikkinchi, Zuhriddin Umrzoqov uchinchi o‘rinni qo‘lga kiritdi.
Tanlovning Namanganda bo‘lib o‘tgan bosqichiga bosma va elektron OAV xodimlari tomonidan 94 ta, tasviriy va kino san’ati, foto va dizayn yo‘nalishlari bo‘yicha 81 ta, adabiyot yo‘nalishi bo‘yicha 10 dan ortiq asar taqdim qilingan.
Olti nominatsiya bo‘yicha 18 nafar ijodkor taqdirlandi.
Har ikkala viloyatda bo‘lib o‘tgan taqdirlash marosimida Matbuot va axborot agentligi bosh direktori Lazizbek Tangriyev, “Tasviriy oyina” ijodiy uyushmasi raisi Isfandiyor Latipov hamda viloyat hokimlari o‘rinbosarlari ishtirok etdi.
Izoh (0)