O‘zbekistonlik yirik tadbirkorlar Namanganda yoshlar uchun mahorat darslari o‘tdi

Yoshlar ittifoqi ko‘magida tashkil etilgan “Global tadbirkorlik tarmog‘i” doirasidagi mahorat darslarini o‘tish uchun o‘zbekistonlik bir guruh yirik tadbirkorlar Namanganga keldi. Bu haqda “Daryo” muxbiri xabar bermoqda.

Mehmonlar dastlab “Istiqlol” dizayn markazi (Ideal Textile Group) va Rouston mebel korxonasida bo‘lib, mahsulotlari nafaqat O‘zbekiston, balki xorijda ham taniqli bo‘lgan mahalliy tadbirkorlar faoliyati bilan tanishdi.

So‘ng Namangan shahridagi Davlat xizmatlari markazi borib ko‘rildi. Ularga bu yerda aholi va tadbirkorlar uchun yaratilgan imtiyozlar, ko‘rsatilayotgan 100 dan ortiq xizmat turi haqida hikoya qilindi.

Namangan viloyati hokimligida o‘tkazilgan davra suhbatida yosh tadbirkorlar bilan bevosita muloqot uyushtirildi. Ular o‘rtaga tashlagan muammo va takliflar tinglandi.

Dastur Namangan shahridagi Yoshlar markazida o‘tkazilgan “Muvaffaqiyatga erishish sirlari” mavzusidagi mahorat darslari bilan yakunlandi. Unda 300 nafardan ortiq ishtirokchi — kollej bitiruvchilari, biznesini boshlash arafasida turgan yigit-qizlar, yosh tadbirkorlar ishtirok etdi.

Xalqaro biznes va texnologiyalar assotsiatsiyasi boshqaruvi raisi Hikmat Abdurahmonov, “Dekos” va “Offise Market” korxonalari asoschisi Hasan Mamasaidov, “Deli.uz” rahbari Husan Mamasaidov, “Edu-Action” asoschisi Umid Eshmuhammedov, Paynet, LeBazar asoschisi Botir Arifjonov, “Ground Zero” kovorking markazlari rahbari Abdulahad Qo‘chqorov, Fiori Flower Boutique asoschisi Nodira Vohidova, “Nestle O‘zbekiston” kompaniyasi bo‘lim boshlig‘i Nigora Oqilova ish tajribalari bilan o‘rtoqlashdi, yoshlarning ko‘plab savollariga javob berdi.

— “Faol tadbirkorlik va innovatsion g‘oyalar va texnologiyalarni qo‘llab-quvvatlash yili” doirasidagi bunday tadbirlar, uchrashuvlar deyarli barcha hududlarda o‘tkazib bo‘lindi. Navbat vodiy viloyatlariga kelgandi, — deydi Fiori Flower Boutique asoschisi Nodira Vohidova.

— Maqsad joylardagi tadbirkorlar faoliyati bilan tanishish, biznesini boshlash istagida bo‘lgan yoshlar bilan uchrashish, ularga maslahat va ko‘mak berishdan iborat. Uchrashuvlardan qanday xulosa qilish mumkin? Yoshlar juda intiluvchan, ko‘zlari yonib turibdi, biroq ko‘pincha ularda bilim yetishmaydi. Investitsiyalarni qayerdan jalb qilish mumkinligi haqida yanglish, romantik tasavvurlar ko‘p. Aksar holatlarda davlat ko‘magiga ko‘z tikib tikib qolinmoqda. Vaholanki, biznesni boshlash va uni rivojlantirish uchun hozirda sharoit va mablag‘ manbalari ko‘p. Faqat ularni izlash va topish kerak. Biz shular haqda tushuncha berishga harakat qilyapmiz.

Tadbirkorlar navbatdagi mahorat darslarini o‘tish uchun Namangandan Qo‘qon shahriga yo‘l oldi.