Iyul so‘ngida Mars Yerga rekord darajada yaqin masofaga keladi

Iyulning so‘nggi kunida Mars Yerga rekord darajada yaqin masofaga keladi. Bu haqda Sky & Telescope jurnaliga tayanib, “RIA Novosti” xabar bermoqda.

31-iyul, seshanba kuni sayyoralar o‘rtasidagi masofa bor-yo‘g‘i 57,5 million kilometrni tashkil qiladi. Natijada Quyosh tizimining to‘rtinchi sayyorasi osmondagi eng yorqin yulduzga aylanadi.

“Agar siz 31-iyul kuni Quyosh botishidan keyin Marsni kuzatsangiz, siz sayyorani tanimaysiz, u shu qadar yorqin nur sochayotgan bo‘ladi. Uning olovrang va qizil tusda nurlanishi e’tiboringizdan chetda qolmasligi aniq”, — deydi Finlyandiyadagi Xelsinki universiteti astronomi Diana Hannikaynen.

Yozning qolgan qismi davomida sayyoralar o‘rtasidagi yaqin masofa saqlanib qoladi. Sentyabrda sayyoralar bir-biridan uzoqlashishni boshlaydi.

2003-yilning avgustida Yer va Mars o‘rtasidagi masofa 55,7 million kilometrni tashkil qilgan.