2017—2018-yillarda diniy ekstremistik guruhlarga aloqador bo‘lgan va nazorat ro‘yxatiga olingan 2 273 nafar shaxs to‘liq reabilitatsiya qilinib, maxsus ro‘yxatdan chiqarildi. Shu jumladan, 17—20 yil mobaynida ozodlikdan mahrum bo‘lgan 181 nafar fuqaro o‘z oilasi bag‘riga qaytdi, deb yozadi O‘zA.
Toshkent shahar hokimligi tomonidan ishga joylashishda yoki yangi tadbirkorlik faoliyatini boshlashda ularga moliyaviy yordam ko‘rsatgan shaxslarga Hajga navbatsiz borishda yordam ko‘rsatilishi belgilangan edi. Ana shunday fuqarolardan biri qamoq jazosini o‘tab qaytgan ikki nafar fuqaroga moliyaviy yordam ko‘rsatdi.
Yunusobod tumani, “Yunusobod” mahallasida istiqomat qiluvchi Nozimbek Hakimovga tadbirkorlik faoliyatini yo‘lga qo‘yish uchun dastlab 15 million so‘m miqdorida mablag‘ zarur edi. Shuningdek, Uchtepa tumani, “Xurshid” mahallasida istiqomat qiluvchi Hikmat Ahmedov sartaroshlik kasbini davom ettirish maqsadida zarur asbob-uskunalarni xarid qilish uchun 3 million so‘m mablag‘da yordam berishni so‘ragan. Mazkur vaziyatdan xabar topgan fuqaro (ismini sir tutishni ma’qul ko‘rgan) o‘z xohishi va tashabbusi bilan ularga yordam ko‘rsatdi.
“Hamyurtlarimiz orasida savobli ishlarga bosh qo‘shadigan insonlar ko‘p. Vaqtida turli sabablar bilan adashib yot oqimlarga qo‘shilib qolgan fuqarolar bugun afv etilib yoki jazo muddatlarini o‘tab ijtimoiy hayotga qaytmoqda. Ular ijtimoiy hayotimizdan chekkada qolib ketishlari kerak emas. Ularga hayotda o‘z yo‘llarini topishda, ishga joylashishda yordam ko‘rsatish aslida barchamizning vazifamizdir”, — deydi Toshkent shahar hokimining jamoat va diniy tashkilotlar bilan aloqalar bo‘yicha o‘rinbosari Shuhrat Turdiqulov.
Izoh (0)