Millatlararo munosabatlar qo‘mitasi tashkil etilganiga 1 yil to‘ldi (foto)

25-iyun kuni Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stlik aloqalari qo‘mitasi majlislar zalida qo‘mita tashkil etilganining 1 yilligi munosabati bilan matbuot anjumani tashkil etildi.

Matbuot anjumanida respublikada faoliyat yuritayotgan madaniy markazlar rahbarlari va faollari, do‘stlik jamiyatlari mutasaddi xodimlari, turli vazirlik va tashkilotlardan taklif etilgan mehmonlar hamda OAV xodimlari ishtirok etdi.

Bugungi kunda O‘zbekistonda yashayotgan 32 million aholining 27 millionga yaqinini o‘zbeklar, 5 milliondan ortiqrog‘ini esa 130 dan ortiq millatga mansub fuqarolar tashkil etadi.

Qo‘mita respublikadagi 138 ta milliy madaniy markaz, 34 ta do‘stlik jamiyati faoliyatini muvofiqlashtirib, O‘zbekistondagi barcha millatlar va elatlar tarixi, madaniyati, an’ana hamda urf-odatlarini asrashga hissa qo‘shib kelmoqda.

Matbuot anjumani doirasida qo‘mita raisi Rustambek Qurbonov va O‘zMTRK raisi Alisher Xo‘jayev o‘rtasida hamkorlik to‘g‘risidagi memorandum imzolandi. Shuningdek, yil davomida qo‘mita faoliyatiga doir yangiliklarni yoritishda faollik ko‘rsatgan OAV xodimlari tashakkurnomalar va esdalik sovg‘alari bilan taqdirlandi.