Moliya vazirligida vazir Jamshid Qoʻchqorov rahbarligida ish haqi belgilangan muddatlarda toʻlanishi yuzasidan navbatdan tashqari yigʻilish boʻlib oʻtdi. Bu haqda vazirlik matbuot xizmati xabar bermoqda.
Yigʻilish davomida joriy yilning yanvar oyida Moliya vazirligi tomonidan quyi moliya organlariga budjet tashkilotlari ishchilarining ish haqi oʻz vaqtida toʻlanishini taʼminlash maqsadida jami 588 milliard soʻm miqdorda qisqa muddatli budjet ssudalari va boshqa mablagʻlar ajratilganligi taʼkidlandi.
Shunday boʻlsa-da, ayrim viloyatlarda budjet tashkilotlari xodimlariga 2017-yil dekabr oyining ikkinchi yarmi uchun ish haqini toʻlash belgilangan muddatlarga nisbatan kechikishiga yoʻl qoʻyilgan.
2018-yilning yanvar oyi davomida ish haqini toʻlash muddatlariga rioya etilmaganligi yuzasidan respublikaning turli hududlaridan bir nechta murojaat (shikoyat)lar kelib tushganligini taʼkidlandi. Xususan, Toshkent viloyati Ohangaron tumaninida joylashgan maktabgacha taʼlim muassasasi xodimi G.I. Kimning Prezident virtual qabulxonasiga murojaatiga koʻra, 2017-yil dekabr oyining ikkinchi yarmi uchun ish haqi pullari 2018-yilning 20-yanvarida vazirlik masʼul xodimlari bevosita aralashuvi tufayligina olingan.
Vazirlikning tarmoq boshqarmalari boshliqlari budjet tashkilotlari tomonidan ish haqini oʻz vaqtida hisoblab, toʻlov hujjatlarini moliya va gʻaznachilik organlariga taqdim etilishi boʻyicha nazoratni taʼminlamaganliklari uchun qattiq tanqid ostiga olindi.
Yigʻilishda vazir oʻrinbosarlari hamda vazirlikning tarmoq boshqarmalari boshliqlariga:
Ish haqi toʻlovi uchun budjet ssudalarini va boshqa mablagʻlarni kechi bilan 2 ish kuni ichida moliyalashtirilishini taʼminlash;
Budjet tashkiloti xodimlariga oyning ikkinchi yarmi uchun ish haqi toʻlanishini kechi bilan keyingi oyning birinchi 5 ish kunida, oyning birinchi yarmi uchun avans toʻlovlarini esa kechi bilan joriy oyning 20-sanasigacha toʻlanishini shaxsiy nazoratga olishlari boʻyicha topshiriqlar berildi.
Maʼlumot uchun, budjet tashkilotlarida oylik ish haqini toʻlanishining kechikish holatlari boʻyicha Moliya vazirligining (371) 200-50-50 raqamli ishonch telefoniga murojaat qilish mumkin.
Izoh (0)