AdMe o‘z baxti uchun kurashishdan to‘xtamagan odamlar haqida ma’lumot to‘plab taqdim etdi.
Terri Kryus, aktyor
Taniqli aktyor amerikacha futbolning professional o‘yinchisi bo‘lgan. 29 yoshida sportdan ketib aktyorlik faoliyatini boshlagan. Haqiqiy mashhurlik unga 37 yoshida, “Krisni barcha yomon ko‘radi” serialida rol ijro etgani sabab kelgan.
Ronald Reygan, AQShning 40-prezidenti
Reygen uzoq vaqt aktyor va radioda suxandon bo‘lib ishlagan, siyosatga esa kechroq qiziqa boshlagan. 56 yoshida Kaliforniya gubernatori etib saylangan bo‘lsa, 69 yoshida AQSh prezidentiga aylangan.
Jon Xemm, aktyor
Jon Xemm film va seriallarda 30 yoshidan boshlab rol ijro etgan. Unga qadar aktyorlik mahoratidan dars bergan va ofitsiant bo‘lib ishlagan. “Aqldan ozganlar” serialidagi Don Dreyper roli unga 36 yoshida mashhurlik olib kelgan. Shundan so‘ng Xemm bir necha bor “Oltin globus” va “Emmi” mukofotlarini qo‘lga kiritdi.
Brayan Krenston, aktyor, ssenariynavis, rejissor
Krenston yoshligida yuk tashuvchi bo‘lib ishlagan. 44 yoshida u “Malkolm diqqat markazida” serialidagi asosiy rollardan birini o‘ynagan, unga qadar esa epizod rollar va reklamalarda suratga tushib yurgan.
Riki Jerveys, qiziqchi, aktyor, rejissor, prodyuser
40 yoshida Britaniyaning mashhur “Ofis” serialini yaratgan va undagi asosiy rollardan birini o‘zi ijro etgan. Bunga qadar u Seona Dancing musiqiy guruhida qo‘shiq kuylagan.
Eng Li, rejissor
Hozirda Eng Lining hisobida 3 ta “Oskar” mavjud. Rejissor ularni “Pi hayoti”, “Bukri tog‘” hamda Crouching Tiger, Hidden Dragon filmlari uchun qo‘lga kiritgan. Uning talabalik davrlarida yaratgan ishlari omadli chiqqan, biroq 36 yoshigacha u ishsiz yurgan.
Amansio Ortega, tadbirkor, Inditex kompaniyasi asoschisi
Ortega yoshligida kiyim-kechak do‘konida ishlagan. 37 yoshida unchalik katta bo‘lmagan trikotaj mahsulotlarini ishlab chiqarishni yo‘lga qo‘ygan, biroq biznes muvaffaqiyatsizlikka erishgan. 39 yoshida Ortega o‘zining birinchi Zara do‘konini ochgan, hozirda Inditex kompaniyasi va dunyoning 88 ta davlatidagi minglab do‘konlar unga tegishli.
Jek Ma, Alibaba Group kompaniyasi asoschisi
Jek Ma Alibaba Group’ga 35 yoshida asos solgan. Ushbu kompaniya xitoylik biznesmenni dunyoning eng boy odamlaridan biriga aylantirdi. Ma institutni yakunlagach ingliz tili o‘qituvchisi bo‘lib ishlagan va oyiga 15 dollar topgan. 30 yoshiga qadar ish qidirgan, biroq unga hamma joyda rad javobini berishgan.
Piter Til, PayPal kompaniyasi asoschisi
Asli nemis bo‘lgan amerikalik biznesmen uzoq vaqt huquqiy sohada ishlagan. 31 yoshida hozirda eng yirik elektron to‘lov tizimi bo‘lgan PayPal kompaniyasiga asos solgan. Shuningdek, Til o‘zining daromadlarini boshqa yirik kompaniyalarga, masalan Facebook’ka sarmoya kiritishga sarflamoqda.
Izoh (0)