Puchdemon Bryusseldan Barselonaga qaytmadi

Kataloniyaning iste’foga chiqarilgan rahbari Karles Puchdemon Bryusseldan Barselonaga qaytmagan. Bu haqda Kataloniya poytaxtidagi xalqaro aeroportning ma’lumotlariga asoslanib, “RIA Novosti” xabar bermoqda.

Avvalroq, ayrim ommaviy axborot vositalarida Puchdemonning Barselonaga qaytayotgani ma’lum qilingan edi.

29-oktabr, yakshanba kuni Puchdemon va uning mahkamasining yetti nafar sobiq xodimlari Bryusselga jo‘nab ketdi.

30-oktabr kuni Bryusseldagi matbuot anjumanida chiqish qilgan Puchdemon o‘ziga nisbatan tahdidlardan qochish uchun Belgiyaga kelganini aytgan edi. U ayni vaqtda yo‘q bo‘lgan “kafolatlar” berilganidagina Kataloniyaga qaytishini ta’kidladi.

Barselonaga kechki reys bilan kamida ikki siyosatchi—ichki ishlar kengashining sobiq rahbari Joakim Forn va mehnat va ijtimoiy masalalar bo‘yicha sobiq davlat maslahatchisi Dolors Bassa uchib kelgan.

Ma’lumotlarga ko‘ra, Puchdemon o‘z maslahatchilari bilan Bryusselda qolgan.