Qozog‘iston milliy xavfsizlik qo‘mitasining Jambil viloyati bo‘yicha departamenti tomonidan katta hajmda neft gazi o‘g‘irlash va Qirg‘izistonga o‘tkazish bilan shug‘ullanib kelgan jinoiy guruh faoliyatiga chek qo‘yildi. Bu haqda Tengrinews xabar bermoqda.
Dastlabki ma’lumotlarga ko‘ra, Janubiy Qozog‘iston, Jambil va Olmaota viloyatlari kompaniyalari mazkur jinoiy ishga aloqador bo‘lgan. Faqat Qozog‘iston hududida aholining maishiy ehtiyojlarini qondirish uchun sotilishi mo‘ljallangan suyultirilgan neft gazining katta qismi Qirg‘iziston orqali Tojikiston va Afg‘onistonga olib chiqib ketilgan.
Departament tomonidan kontrabanda ishtirokchisi bo‘lgan 13 kishi, jumladan, Qirg‘izistonning 6 nafar fuqarosi aniqlandi. Ularning uzoq vaqt davomida neft gazini xarid qilishga aloqadorligini tasdiqlovchi materiallar musodara etildi. Shuningdek, huquq-tartibot idoralari xodimlarining mazkur guruhga aloqadorligi o‘rganilmoqda.
Ekspertlar hisob-kitobiga ko‘ra, bu harakatlar oqibatida mamlakatga har oyda 650 million tenge miqdorida zarar yetkazilgan.
Izoh (0)