Aziz Haydarov goli bilan klubiga ilk g‘alabani olib berdi. Sardor Rashidov esa zaxira futbolchisi

O‘zbekiston milliy terma jamoasining ikki yetakchi futbolchisi to‘p surayotgan BAA chempionatida 5-tur bellashuvlari bo‘lib o‘tdi.

6 yil davomida “Ash-Shabab” sharafini himoya qilib, yangi mavsumni debyutant “Ajman” safida boshlagan Aziz Haydarov yangi klubidagi ilk golini urdi. Mazkur gol “Ajman”ga mavsumdagi ilk g‘alabani taqdim etdi. Bungacha jamoa ketma-ket 4 ta uchrashuvda imkoniyatni boy bergandi.

Aziz Haydarov “Ajman”ning asosiy figuralaridan biri hisoblanadi. U ortda qolgan 5 ta uchrashuvda asosiy tarkib a’zosi sifatida maydonga chiqib keldi.

Sardor Rashidov to‘p suradigan “Al-Jazira” esa mavsumni ishonchli boshlay olmadi. Uning hisobida 5 ta turdan keyin faqatgina 1 ta g‘alaba bor. Qatar Yulduzlar Ligasidan Sardor Rashidovni chaqirtirib olgan Amirlik chempionatining amaldagi chempioni, turnir jadvalining ekvatoridan ham pastroqda joylashgan.

Klubning gollandiyalik bosh murabbiyi Sardor Rashidovni ortda qolgan 5 ta uchrashuvning 2 tasidagina asosiy tarkibda ko‘rishni istadi. O‘zbekistonlik futbolchi keyingi o‘yinlarda zaxiradan maydonga tushishni boshladi. Jumladan, golsiz durang bilan yakuniga yetgan uchrashuvda ham Rashidov 70-daqiqaga kelib o‘rindiqdan ko‘tarildi.

“An-Nasr” — “Ajman” 0:1

“Al-Jazira” — “Al-Vasl” 0:0