Xelena Freyzer: BMT O‘zbekistonda Ma’muriy islohot konsepsiyasi qabul qilinishini olqishlaydi
BMTning O‘zbekistondagi vakolatxonasi O‘zbekistonda 2017-yil 8-sentabrda Ma’muriy islohot konsepsiyasi qabul qilinganini olqishlaydi. Bu haqda BMTning rezident-koordinatori hamda BMT Taraqqiyot dasturining O‘zbekistondagi doimiy vakili Xelena Freyzerning bayonotida aytiladi, deb xabar beradi UzDaily.
Konsepsiyada 2017–2021-yillar uchun harakatlar strategiyasiga muvofiq ravishda samarador va shaffof davlat boshqaruvi tizimini yaratishga qaratilgan ustuvor islohotlar bayon etilgan, ta’kidladi BMT vakili.
“Bu konsepsiyaning qabul qilinishi mamlakatda barcha darajadagi shaffof, samarador, hisobot beruvchi va inklyuziv institutlar yaratilishidagi muhim qadamdir. Konsepsiyaning amalga oshirilishi BMTning 2030-yilga qadar barqaror rivojlanish sohasidagi kun tartibining, xususan, 16-maqsad — ‘tinchlik, adolat va kuchli institutlar’ maqsadining amalga oshirilishiga ko‘mak beradi”, — qayd qilib o‘tdi Freyzer xonim.
“1993-yildan buyon BMTning O‘zbekistondagi tizimi hukumatga sifatli davlat xizmatlarini ta’minlash hamda inson huquqlari va erkinliklarini himoya qilish borasida yordam ko‘rsatib kelmoqda”.
“Bizning ko‘magimiz xalqaro tajriba va bilimlarni berish, innovatsion tajribaviy tashabbuslar realizatsiyasi hamda milliy hamkorlarga samarador boshqaruv va strategiyalarni ma’lumotlar tahlili asosida ishlab chiqish masalasida konsultatsiya berishdan iborat bo‘ldi. Shuningdek, BMT hukumat bilan davlat xizmatini islohot qilish, elektron hukumat tizimini joriy qilish, davlat xizmatlarini samarador ko‘rsatish, mahalliy boshqaruv va mintaqaviy rivojlanish tizimini takomillashtirish sohalarida hamkorlik qilmoqda”, — deyiladi bayonotda.
“Milliy va xalqaro ekspertlar bilan rivojlanish sohasidagi hamkorlikda BMTning O‘zbekistondagi vakolatxonasi hukumatni ma’muriy islohot konsepsiyasi realizatsiyasi bo‘yicha qo‘llab-quvvatlashni davom ettirish niyatida. Bizning ishimiz oldingiday BMTning O‘zbekiston uchun rivojlanish maqsadlarida ko‘mak berish bo‘yicha hadli bitimiga yo‘naltirilgan bo‘ladi, xususan, 2020-yilga kelib butun aholini sifatli davlat xizmatlari bilan ta’minlashg qadar davlat boshqaruvini takomillashtirish yakuniy maqsadiga qaratiladi”, — xulosa qildi Xelena Freyzer.
