Huawei Farg‘ona vodiysi jurnalistlari uchun trening tashkil qildi
Huawei Tech Investment Tashkent kompaniyasi, jamoatchilik bilan ishlashga ixtisoslashgan Maslov PR Tashkent agentligi hamda Farg‘ona viloyati jurnalistlar uyushmasi hamkorligida Farg‘ona vodiysi jurnalistlari uchun maxsus trening tashkil qildi. Uyushma binosida o‘tgan tadbirda, Andijon, Namangan, Farg‘ona viloyatlaridan, jami 25 nafardan ziyod OAV vakillari ishtirok etdi.
Treningdan asosiy maqsad, jurnalistlarga PR va kommunikatsiyalar sohasida mavjud bo‘lgan yangi trendlar haqida xabar berish, katta korporatsiya va biznes tizimlari hamda davlat muassasalari matbuot xizmatlari bilan to‘g‘ri hamkorlikni o‘rnatishni o‘rgatish, shuningdek Huawei kompaniyasining O‘zbekistonda amalga oshirayotgan ijtimoiy loyihalari borasida ma'lumot berishdan iborat.
“Mamlakatimizda katta o‘zgarishlar amalga oshirilmoqda. Yangi qulayliklar yaratilmoqda va turli biznes yo‘nalishlari uchun yangi imkoniyatlar berilmoqda. Telekommunikatsiya sohasi juda tez rivojlanyapti va istagimiz viloyat OAV yangi texnologiyalar borasida xabardor bo‘lsin hamda yangi davrga tayyor tursin. O‘zbekistonda faoliyat yuritayotgan katta kompaniyalar va endi ish boshlayotgan tashkilotlar uchun, OAV vakillari bilan to‘g‘ridan-to‘g‘ri aloqani yo‘lga qo‘yish juda muhim. O‘z o‘rnida biz kabi yirik xalqaro kompaniyalar ham, jurnalistlar faol bo‘lishini va o‘zlari ijod qilayotgan tahririyat yoki muassasada ish sifatini oshirishini istaydi. Ommaviy axborot vositalari qanchalik professional bo‘lsa, auditoriyaning saviyasi ham shunchalik oshadi va materiallar yanada sifatli bo‘lib, “to‘rtinchi hokimiyat” yanada muhimroq ahamiyat kasb eta boshlaydi va bu o‘z navbatda davlat organlarini yanada mas’uliyatliroq bo‘lishga undaydi”, — deya ta’kidladi Huawei kompaniyasi matbuot kotibi Davron Azizov.
Aytib o‘tish joizki, bu kabi sayyor trening Huawei uchun ilk tajriba bo‘lgani sabab, kompaniya vakillari xalqaro tajribaga ega bo‘lgan PR-agentlikni hamkorlikka chaqirgan.
“Bizning kompaniyamiz O‘zbekistonda 2008-yildan beri faoliyat yuritib keladi va deyarli barcha ommaviy axborot vositalari bilan aloqaga ega. Asosiy maqsadimiz jurnalistlarga eski udum bo‘lgan — quruq press-relizlar va umumiy ma'lumotlar bilan chegaralanib qolmaslikni tushuntirishdir. Rivojlangan mamlakatlarda press-reliz yoki axborot individual ishlanib, maxsus savollar, dalil va tahliliy ma’lumotlar bilan boyitiladi hamda materialga sayqal berilib, auditoriya uchun yanada qiziqarli qilib tayyorlanadi. Viloyatlarda faoliyat yuritayotgan ko‘pchilik jurnalistlar, ayniqsa, bosma nashrlar ularni kam odam o‘qishidan noliydi. Biz mazkur trening doirasida, jurnalistlarga ularning materiallari yanada informatsion bo‘lishi uchun nima talab qilinishini, hamda matbuot xizmatlari bilan qanday qilib aloqa o‘rnatib, mushtariylar uchun qiziq bo‘lgan xabarlarni tayyorlash uslublari haqila ma'lumot beramiz”, — deydi Maslov PR Tashkent agentligi direktori Barno Nazarzoda,
Farg‘ona viloyati jurnalistlar uyushmasi rahbari, taniqli jurnalist Muhammadjon Obidovga ko‘ra, bu kabi treninglar juda muhim ahamiyatga ega bo‘lib, OAV vakillarining professionalik darajasini oshishiga xizmat qilishi mumkin.
“Biz Huawei kompaniyasi aynan Farg‘onada bu kabi tadbirni tashkil etayotganidan mamnunmiz. Farg‘onda 100 ga yaqin media-resurslar mavjud bo‘lib, ijodkorlar ancha ko‘p va ular yangi texnologiyalar haqida bilishga chanqoq hamda hamisha zamon bilan hamnafas bo‘lib yurishga tayyor”, — dedi Muhammadjon Obidov.
Ma’lumot o‘rnida shuni aytib o‘tish lozimki, trening so‘nggida Huawei kompaniyasi tomonidan “Telekommunikatsiya va mobil texnologiyalar sohasidagi eng yaxshi material” tanlovi e'lon qilindi. Eng qiziq, ko‘p o‘quvchi olib kelgan material mualliflari Xitoyga, kompaniya tomonidan tashkil qilinadigan media turga borish imkonini qo‘lga kiritadi.
Reklama huquqi asosida
