Rossiyadagi eng katta oshqovoqni 21 yoshli psixolog Aleksandr Chusov yetishtirdi. U urug‘ni aprel oyida yerga qadagan va ayni vaqtda oshqovoqning og‘irligi 400 kilogrammga yetmoqda. Bu kabi o‘lchamdagi oshqovoqni yetishtirish oson bo‘lmagan, deb xabar berdi “MK.ru”.
Aleksandr oshqovoq tomirlarini bahor-yozgi sovuqlardan himoya qilish maqsadida 48 kvadrat metr maydonni kovlab, tuproq ostiga isitish simlarini joylashtirib chiqdi, gigant oshqovoqning ustiga esa infraqizil chiroqli boshpana qurdi.
“Atlantic giant navining urug‘ini 100 dollarga qovoqlarni yetishtirish bo‘yicha ikki karra champion amerikalik Ron Uollesdan sotib olgandim. Unga suv yetarli miqdorda bo‘lishi uchun maxsus usuldan foydalandim. Har bir o‘sgan bargi oshqovoqni oziqlantirishi uchun ularni yerga ko‘mib qo‘ydim. Uni parvarishlash uchun kuniga 4—5 soat sarfladim”, — dedi Chusov.
Yaqin kunlarda oshqovoq maxsus avtomobil va kran yordamida Moskvadagi ko‘rgazmaga olib boriladi. U yerda oshqovoq Rossiya rekordlari kitobiga kirish uchun nomzodlik qiladi.
Hozirda eng katta oshqovoq Belgiyada ro‘yxatdan o‘tgan bo‘lib, uning og‘irligi 1190 kilogrammga teng.
Izoh (0)