Piyoz, sarimsoq va sabzavotlarning erta bahorgi hosili 2018-yil mart oyidan pеshtaxtalarga chiqadi

Prezidentning 21-avgustdagi PQ-3230-son “2018-yil hosili uchun avgust piyozi va sarimsoqpiyoz hamda to‘qsonbosti usulida sabzavot ekinlarini joylashtirish, ekish uchun talab etiladigan moddiy-texnika resurslarini o‘z muddatida yetkazib berish chora-tadbirlari to‘g‘risida”gi qarori imzolandi. Hujjat davlat rahbarining rasmiy saytida joylashtirilgan, deb xabar beradi Norma.

Hujjat bilan Qoraqalpog‘iston, viloyatlar va ularning tumanlari kesimida 2018-yil hosili uchun avgust piyozi va sarimsoqpiyoz hamda to‘qsonbosti usulida sabzavot ekinlarini turlari bo‘yicha joylashtirishning prognoz ko‘rsatkichlari, barcha toifadagi xo‘jaliklarda yetishtiriladigan sabzavot mahsulotlarining prognoz ko‘rsatkichlari, shuningdek, sabzavot ekinlarini ekish uchun talab etiladigan urug‘lik, mineral o‘g‘it va yonilg‘i-moylash mahsulotlari hajmlari hisob-kitobi tasdiqlandi.

2017-yil 25-avgustgacha fermer va dehqon xo‘jaliklariga dorilangan va sertifikatlangan urug‘liklar 50 foiz haqini oldindan to‘lash sharti bilan yetkazib beriladi. 10-sentabrgacha esa Toshkent shahar yarmarkalari, tayyorlov va eksport qiluvchi tashkilotlar fermer xo‘jaliklariga tuzilgan kontraktatsiya shartnomalariga muvofiq shartnoma qiymatining 40 foizidan kam bo‘lmagan miqdorda avans mablag‘larini o‘tkazib beradi.

Ekinlarni ekish va ularni parvarishlash uchun yonilg‘i-moylash mahsulotlari respublikada shakllangan narxlarga 10 foizgacha ustama qo‘yilishi orqali ta’minlab beriladi.

Erta bahorda yetishtirilgan mahsulotlar 2018-yilning mart oyidan boshlab ichki bozorlar va Toshkent shahar yarmarkalariga yetkazib beriladi.

Hujjat qator boshqa qoidalarni ham o‘z ichiga oladi.