Istanbulda Yevropada teraktlar tayyorlagan IShID jangarisi qo‘lga olindi

Turkiya xavfsizlik kuchlari Istanbulda IShIDning Interpol tomonidan qidirilayotgan a’zosini ushladi. Bu haqda “TASS” xabar bermoqda.

Politsiya xodimlari aksilterror operatsiyasini besh kun muqaddam boshlagan edi. Ekstremist shaharga kelgani haqidagi razvedka ma’lumotlari asosida operatsiya boshlandi.

Terrorchining ismi — Mahdi A. U asli belgiyalikdir. U uch yildan buyon Interpol tomonidan qidirilmoqda. Istanbulga kelgach, portlovchi uskunalar tayyorlash bo‘yicha mutaxassis hisoblangan Mahdi A. Yevropada teraktlar tayyorlash bilan shug‘ullangan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.