27-iyul, payshanba kuni “O‘zbekiston” telekanali orqali “Biz uchun muhim” tok-shousining navbatdagi soni to‘g‘ridan to‘g‘ri efir orqali uzatildi. Bu safargi ko‘rsatuv 1-avgustdagi test imtihonlariga bag‘ishlandi.

Foto: “Daryo”

Ko‘rsatuvda ekspertlar sifatida O‘zbekiston Respublikasi Oliy va o‘rta maxsus ta’lim vazirligining Kadrlar tayyorlash va oliy ta’lim muassasalarini tashkiliy-metodik ta’minlash bosh boshqarmasi boshlig‘ining o‘rinbosari Barno Rajabov, Davlat test markazi bo‘lim boshlig‘i Qayum Boymirov, Sharqshunoslik instituti rektori Abdurahim Mannonovich, Toshkent temir yo‘l muhandislari instituti rektori Ma’rufjon Rasulov, huquqshunos Xushnudbek Xudoyberdiyev, shuningdek, adabiyotshunos Omonulla Madayev, “O‘zbekiston ovozi” gazetasining bosh muharriri Safar Ostonov, ommaviy axborot vositalari vakillari va abituriyentlar ishtirok etdi.

Dastur davomida 730 mingga yaqin abituriyentlarni qiynayotgan masalalar yuzasidan turli savollar berildi. O‘qituvchi va tomoshabinlar tomonidan turli takliflar taqdim etildi. Adabiyotshunos Omonulla Madayev testlarda beriladigan savollarni tandiq ostiga oldi.

Filologiya fakultetiga topshirayotgan abituriyent uchun beriladigan ona tili fanidan savollar bilan Toshkent tibbiyot akademiyasiga topshirayotgan abituriyentning ona tilidagi test savollari bir-biridan farq qilishi kerak. Axir qanday qilib filolog bilan boshqa mutaxassislikka kirmoqchi bo‘lgan abituriyentlarga bir xil darajadagi savollar beriladi? Boshqa fanlarda ham xuddi shunday. Tarixchilar uchun tarix fanidan savollar qiyinroq bo‘lishi, filologlar uchun tarix fanidan savollar oson bo‘lishi kerak. Savollarni o‘qib ko‘rganmisiz hech? Bir-biridan uzun, murakkab savollar. Maorif tizimidagi 39 yillik tajribamda bunaqa savollarni ko‘rmaganman. Bu kabi savollarni farzandi yo‘q odam tuzgan, deb o‘ylayman.

Shuningdek, o‘qishga qabul qilish imtihonlariga insho yozishni ham joriy etish kerak. O‘qishga kirgan talabalarning ko‘p qismi to‘g‘ri yozishni ham bilmaydi.

Omonulla Madayev, adabiyotshunos.

Bundan tashqari ijodiy imtihoni bor institut yoki universitetlarda imtihonni bevosita kuzatib borish uchun nazorat kameralarini qo‘yish lozimligi, oliy ta’lim muassasalariga qabul jarayoni imtihonlari testini onlayn ravishda o‘tkazish kabi takliflar bildirildi.

Oliy va o‘rta maxsus ta’lim vazirligi hamda Davlat test markazi vakillari bu borada keraklicha ishlar qilinayotganini, kelgusi yillarda yuqorida bildirilgan takliflar albatta inobatga olinishini ma’lum qildi.