O‘zbekiston Prezidenti Shavkat Mirziyoyev 15-iyul, shanba kuni Toshkent shahrining Yunusobod tumaniga tashrif buyurdi. Tumanda bu tashrifga so‘nggi tayyorgarlik ishlari bir necha kun avval boshlangan edi. Va, taxminlarga ko‘ra, Yunusobod dehqon bozoridagi go‘sht narxining birdan arzonlashishi ham tayyorgarlikning bir qismi bo‘ldi.

Foto: Facebook / “Maslahat.uz”

Yunusobod dehqon bozorida bir kilogramm mol go‘shti 21 ming so‘mdan sotilayotgani haqida gap-so‘zlar paydo bo‘lganiga bir necha kun bo‘ldi. 15-iyul kuni esa ijtimoiy tarmoqlarda go‘shtga navbatda turgan odamlarning suratlari e’lon qilindi. Foydalanuvchilarning bir guruhi mazkur vaziyatdan foydalanib qolish zarurligi haqida gapirayotgan bo‘lsa, boshqalar fikrlashga chorlamoqda.

Toshkentning hech bir joyida hozir 21 ming so‘mdan go‘sht topib bo‘lmaydi. Shaharda bir kilogramm mol go‘shtining standart narxi, suyakli bo‘lsa — 35 ming so‘mdan, suyaksiz lahmi esa 38—40 ming so‘mdan kam emas. Yirik supermarket tarmoqlarida go‘sht 45—47 mingdan sotilmoqda. Lekin Prezidentning tashrifi arafasida Yunusobod bozorida go‘sht 21 ming so‘m qilib qo‘yildi...

Nega bozorlarimizda hanuzgacha tartib yo‘q? Qachongacha bu hol davom etadi? Qachongacha bir-birimizni aldab yuramiz? Qachongacha faqat katta reydlar bo‘lganida vaqtdan foydalanib, ikki-uch soat navbatda turib (shunda ham, ulgursak), bozor qilishimiz kerak?

Facebook’dagi “Maslahat.uz” guruhi foydalanuvchisi

Ba’zi foydalanuvchilar mazkur vaziyatda qassoblarni ayblagan. Biroq boshqalar qassoblar o‘z zarariga go‘sht sotmasligini uqtirishga uringan. “Bu yerda gap qassoblarda emas, go‘shtni 21 ming so‘mdan sotishga qassoblarni majbur qilgan odamlarda. O‘sha odamlar go‘sht narxini o‘zgartirib, kelib-kelib Prezidentimizni aldamoqchi bo‘lyapti”, — deb yozadi foydalanuvchilardan biri.

“Nahotki shu ko‘zbo‘yamachiliklardan Shavkat Mirziyoyevning xabari bo‘lmasa? Bu birinchi holat emas. Biror kattakon keladigan bo‘lib qolsa, o‘sha joy darhol obod va arzonchilik bo‘lib qoladi”, — deb yozadi boshqa bir foydalanuvchi.

Ayni vaqtda, go‘sht narxining 40 minggacha ko‘tarilib ketishi yemning qimmatligi bilan bog‘liqligini ta’kidlaganlar ham bor. “Go‘sht narxini tushirish osondek gapirasizlar. Buning uchun yem narxini tushirish kerak. Bir mahsulot qiymati boshqa tarkibiy mahsulotlar bahosiga bog‘liq”, — deb yozgan foydalanuvchilardan biri.

“Qassob molni qimmatga olganidan keyin, go‘shtni ham qimmat sotadi-da. Majburlab teng yarim bahosida sottirishsa, qassob: ‘Osh bo‘lsin!’, deb sotganiga shubham bor”, — degan boshqa foydalanuvchi.

Avvalroq “O‘zbekoziqovqatxolding” kompaniyasi mamlakatda go‘sht narxining oshishi ikki omilga bog‘liqligini, omillardan biri yem narxining oshishi ekanini ma’lum qilgan edi.

Ayni vaqtda, “Darakchi.uz”ning yozishicha, go‘sht va go‘sht mahsulotlari eksportiga nisbatan taqiqning olib tashlangani ham narxlarning o‘sishiga ta’sir qilgan. “Ayni damda tovuq go‘shti eksporti bo‘yicha qaror loyihasi tayyorlanmoqda. Shu munosabat bilan bu mahsulotning narxi ham oshishi ehtimoldan xoli emas”, — deyiladi nashr xabarida.