“Chinni bozor”da yuk tashuvchi yigit hamkasbiga pichoq urdi

9-iyul kuni soat 04.35 larda Zangiota tumani, Eshonguzar qo‘rg‘onida joylashgan Hunarmandlar bozoridagi (Chinni bozor) ombor oldida Qoraqalpog‘istonning Xo‘jayli tumanida yashovchi, bozorda yuk tashuvchi bo‘lib ishlaydigan A. Y. o‘zaro janjallashib, Buxoro viloyati, Vobkent tumanidan kelgan yuk tashuvchi  J. G.ning ko‘krak qafasiga pichoq bilan ikki marotaba urib, tan jarohati yetkazdi. Bu haqda “Daryo”ga Toshkent viloyat IIB matbuot xizmati ma’lum qildi.

J.G. Toshkent tibbiyot akademiyasi 2-klinikasi jonlantirish bo‘limiga yotqizildi.

Ushbu holat yuzasidan O‘zbekiston Respublikasi Jinoyat Kodeksining tegishli moddalari bilan jinoyat ishi qo‘zg‘atildi.