O‘zbekiston shifokorlar termasi Buyuk Britaniyani taslim qilib, JCh yarim finaliga chiqdi

Avstriya mezbonlik qilayotgan futbol bo‘yicha Morell Cup turnirida O‘zbekiston shifokorlar terma jamoasi yarim finalga yo‘l oldi.

Braziliya, Avstriya, AQSh kabi termalar joy olgan “A” guruhini peshqadam sifatida yakunlagan o‘zbekistonlik shifokorlar, chorak finalda Buyuk Britaniyaga qarshi saf tortdi. Bellashuvning 25-daqiqasida Toshkent oilaviy shifoxonasi (Tashkent City Family Clinic) otolaringologi Nasriddin Hasanov urgan yagona gol jamoani yarim finalga olib chiqdi.

Britaniyaliklar guruh bosqichida Rossiya bilan 0:0 hisobida durang o‘ynagan, Avstraliya (3:0) va Argentina (2:0) termalarini mag‘lub etgandi. Bunda ular o‘z darvozasi dahlsizligini saqlab qolgandi.

Chorak finalning qolgan o‘yinlari bugun kechgacha bo‘lib o‘tadi. Shundan so‘ng O‘zbekiston shifokorlarining final ostonasidagi raqibi aniq bo‘ladi.

Morell Cup Chorak final 13-iyul, payshanba

O‘zbekiston — Buyuk Britaniya 1:0