Qozog‘istonda yangilangan Captiva va Aveo chiqariladi

Kuz oylarida Qozog‘istondagi Chevrolet qatoridagi ikkita model yangilanadi. “Aziya avto” zavodi o‘z quvvatlarida yangilangan Aveo sedani va Captiva krossoverini chiqarishni yo‘lga qo‘ymoqchi, deb xabar beradi 1News.

Sentabr oyida Qozog‘istonda paydo bo‘lishi kutilayotgan Aveo AQShda 2016-yil martida Sonic nomi ostida taqdim etilgan edi. Uzunligi 4,4 metrga teng avtomobil yangi bamperlarga, faralarga va chiroqlarga, shuningdek, boshqa radiator panjarasi va kapot qopqog‘iga ega bo‘ladi. Qozog‘iston bozorida Aveo 1.6 litrli, 116 ot kuchiga ega benzinli motor hamda 6 bosqichli transmissiya bilan chiqariladi.

Yangilangan 7 o‘rinli Captiva ilk bor 2015-yil noyabrida Dubayda namoyish etilgan edi. Ushbu modifikatsiya bugun O‘zbekistonda yig‘ilmoqda. Krossover yangi optikaga egaligi bilan diqqatga sazovor. Shuningdek, unda oltita xavfsizlik yostiqchasi bo‘ladi. Motor gammasi ikki variantdan iborat: 167 ot kuchiga ega 2,4 litrli va 249 ot kuchiga ega 3 litrli. Ikkalasi ham 6 bosqichli avtomat o‘tkazmalar qutisi bilan uyg‘unlikda ishlaydi.