Moskva shahri va viloyatida yuz bergan dovul qurbonlari soni 16 kishiga yetdi

Moskva shahri va Moskva viloyatida yuz bergan dovul qurbonlari soni 16 kishiga yetdi. Bu haqda “RIA Novosti” xabar bermoqda.

Oldinroq Rossiya poytaxtida tabiiy ofat tufayli 11 kishi halok bo‘lgani bildirilgandi.

Moskva viloyati gubernatori Andrey Vorobev mintaqada 5 kishi dovul qurboni bo‘lgani, jami 34 kishi jabrlanganini ma’lum qildi.

Moskva shahrida salkam 150 kishi tibbiy muassasalarga yetkazildi. Ulardan 108 nafari, jumladan, 22 bola hozirda ham kasalxonalarda qolmoqda.

Shahar meri Sergey Sobyaninga ko‘ra, dovul oqibatida halok bo‘lganlarning oilasiga 1 million rubldan tovon to‘lanadi.