British Airways styuardlari yamaykalik xasta yo‘lovchini o‘rindiqqa kishanlab qo‘ydi

British Airways aviakompaniyasi styuardlari yamaykalik xasta yo‘lovchini o‘rindiqqa kishanlab qo‘ydi. Bu haqda “Vesti.ru” xabar bermoqda.

Yamaykaning 65 yoshli fuqarosi, saraton va qand kasaliga chalingan Kvame Bantuning Londondan parvozidan bir soat o‘tib (Yamaykaga uchish 14 soat davom etadi), boshi aylanib, oyog‘i toliqa boshladi. Ularga biroz dam berish uchun yo‘lovchi o‘tirgichlari kengroq bo‘lgan “biznes-klass”ga vaqtincha o‘tdi.

Biroq bort kuzatuvchilari uning holatiga parvo qilmadi. Yamaykalik “ekonom-klass”dagi joyiga qaytarib o‘tqazildi, qo‘lini qayish yordamida bog‘lab, jinoyatchi kabi kishanlab qo‘yildi. Hatto hojatxonaga chiqishiga ham ruxsat berilmadi.

Yo‘lovchi ayollardan biri keksa erkakni himoya qilishga kirishdi va o‘rtada tortishuv boshlandi. Natijada samolyot Atlantika okeani orollaridan birida ko‘zda tutilmagan qo‘nishni amalga oshirdi.

U yerda yamaykalik yo‘lovchi va uni himoya qilgan ayol politsiya ixtiyoriga topshirildi. Politsiya ularni so‘roqqa tutdi, biroq qo‘lga olmadi. Layner esa Buyuk Britaniyaga qaytdi.

Aviakompaniya hodisa yuz berganini tasdiqladi. British Airways versiyasiga ko‘ra, keksa yo‘lovchi o‘z o‘rniga o‘tirishdan bosh tortgan va bort kuzatuvchilarini haqorat qilgan.