British Airways стюардлари ямайкалик хаста йўловчини ўриндиққа кишанлаб қўйди

British Airways авиакомпанияси стюардлари ямайкалик хаста йўловчини ўриндиққа кишанлаб қўйди. Бу ҳақда «Вести.ru» хабар бермоқда.

Ямайканинг 65 ёшли фуқароси, саратон ва қанд касалига чалинган Кваме Бантунинг Лондондан парвозидан бир соат ўтиб (Ямайкага учиш 14 соат давом этади), боши айланиб, оёғи толиқа бошлади. Уларга бироз дам бериш учун йўловчи ўтиргичлари кенгроқ бўлган «бизнес-класс»га вақтинча ўтди.

Бироқ борт кузатувчилари унинг ҳолатига парво қилмади. Ямайкалик «эконом-класс»даги жойига қайтариб ўтқазилди, қўлини қайиш ёрдамида боғлаб, жиноятчи каби кишанлаб қўйилди. Ҳатто ҳожатхонага чиқишига ҳам рухсат берилмади.

Йўловчи аёллардан бири кекса эркакни ҳимоя қилишга киришди ва ўртада тортишув бошланди. Натижада самолёт Атлантика океани оролларидан бирида кўзда тутилмаган қўнишни амалга оширди.

У ерда ямайкалик йўловчи ва уни ҳимоя қилган аёл полиция ихтиёрига топширилди. Полиция уларни сўроққа тутди, бироқ қўлга олмади. Лайнер эса Буюк Британияга қайтди.

Авиакомпания ҳодиса юз берганини тасдиқлади. British Airways версиясига кўра, кекса йўловчи ўз ўрнига ўтиришдан бош тортган ва борт кузатувчиларини ҳақорат қилган.