Pentagon rahbari Putinni Rossiya va AQSh o‘rtasida murakkab munosabatlarni yuzaga keltirishda aybladi

Yanvar oxirida AQShning saylangan prezidenti Donald Tramp inauguratsiyasidan keyin o‘z lavozimini tark etadigan AQSh mudofaa vaziri Eshton Karter Rossiya AQShning rejalarini barbod qilishga qaratilgan strategiyani qabul qilganini aytdi, deb yozadi “RBK”.

Karterning so‘zlariga ko‘ra, Rossiya prezidenti Vladimir Putinning AQShning ta’sirini zaiflashtirish borasidagi ko‘payib borayotgan urinishlari Moskva va Vashington hamkorlik qilishi mumkin bo‘lgan sohalar qidiruvini qiyinlashtirdi.

“Bu uning konsepsiyasining bir qismidek, go‘yo. Uning siyosati muvaffaqiyatini aniqlashning usullaridan biri esa — bu joylardagi natija emas, balki u dunyoning qolgan qismida yarata oladigan noqulaylik va o‘z xalqiga o‘z siyosatining tayanch nuqtasi sifatida taqdim etishi”, — dedi Karter The Wall Street Journal’ga bergan intervyusida.

Pentagon rahbari so‘zlariga ko‘ra, aynan shuning uchun Rossiya yetakchilari bilan aloqalar o‘rnatish juda qiyin.