Ko‘plab nashrlar “Oltin to‘p” kimga nasib etishi borasida antiqa so‘rovnomalar o‘tkazib, uning barcha variantlariga Krishtianu Ronaldu nomini yozib chiqqandi. Portugaliyalik futbolchining asosiy raqobatchisi Lionel Messidan bu qadar o‘zib ketishiga sabab nimada edi?
La Liga
“Barselona” 2015/16-yilgi mavsumni juda yaxshi boshladi. “Real” ustozi etib Rafael Benitesning tayinlanishi “qirollik klubi” o‘yiniga ta’sir o‘tkazmay qolmadi. 2015-yilning 21-noyabr kuni dahshatli voqealardan biri sodir bo‘lib, “Barselona” Madridda “Real” darvozasiga javobsiz 4 ta gol urdi.
Bellashuvda Krishtianu Ronaldu to‘liq o‘ynadi. Messi esa 57-daqiqaga kelib, aniqrog‘i, maydonda deyarli barchasi hal bo‘lib ulgurgan bir paytda paydo bo‘ldi. Shunday bo‘lsa-da, ikki buyuk futbolchining raqobatida tarozining pallasi Messi tomon og‘a boshladi.
“Barselona”ni to‘xtatib bo‘lmaydigandek ko‘rindi. 2016-yilning 2-apreliga kelib esa bu ishni “Real”ning o‘zi uddaladi. Zidan murabbiy sifatidagi birinchi “El-Klasiko”sida “Kamp Nou”dan g‘alaba bilan qaytdi.
Messi ham, Ronaldu ham bunda bor edi. Bahs taqdirini Ronalduning 85-daqiqada kiritgan g‘alaba goli hal etdi. Futbolchilar raqobatida tarozining pallasi tenglashdi.
“Real” mavsum yakuniga qadar katta farqni yo‘qqa chiqara olmasa-da, mavsumni 1 ochkolik farq bilan 2-o‘rinda yakunladi. To‘purarlik Luis Suaresga nasib qildi — 40 ta gol. Krishtianu bu borada ikkinchi bo‘ldi — 35 ta gol. Messi esa 26 ta gol bilan uchlikdan joy oldi.
Mana shu holatda ham tarozining pallasi Krishtianu Ronaldu tomoniga og‘masdi. Nima bo‘lgan taqdirda ham “Barselona” La Liga oltinlariga ega chiqib olgandi.
Chempionlar Ligasi
Krishtianu Ronalduning to‘rtinchi “Oltin to‘p”iga eng katta xizmat qilgan turnir bu so‘zsiz Chempionlar Ligasidir.“Barselona” o‘z oyog‘iga ¼ finaldayoq bolta urib, “Atletiko” dovonidan o‘ta olmadi. “Real” esa finalda “Atletiko”ni taslim qilib, bosh sovringa ega chiqdi. Penaltilar seriyasiga qadar cho‘zilgan o‘yinda hal qiluvchi beshinchi zarbani Krishtianuning o‘zi amalga oshirdi va “Real” chempion.
Turnirning alohida ko‘rsatkichlari bo‘yicha ham Ronaldu yetakchilik qildi. 12 ta uchrashuvda ishtirok etgan “Real” a’zosi 16 ta gol urib, ta’qibchilarini o‘ziga yaqinlashtirmadi ham. Chunki 2-o‘rinni olgan Robert Levandovski hisobida 9 ta gol bor edi.
To‘g‘ri, jarohati sabab Messi bir qator o‘yinlarni qo‘yib yubordi. 7 ta bellashuvda 6 ta gol Ronalduning natijasi oldida juda oddiy. Biroq Lionelning jarohatida Ronalduning aybi yo‘q. U “Real”da o‘z ishini qildi va yakunda jamoasini chempion qildi.
La Ligada 40 ta gol urgan Luis Suaresning natijasi ham “Barselona” chorak finalda qolib ketgach o‘z-o‘zidan ko‘kka uchdi. Suares Chempionlar Ligasidagi 9 ta o‘yinda 8 ta gol urishga muvaffaq bo‘lgandi.
Terma jamoa
“Oltin to‘p” sohibi kim bo‘lishi kerak degan savolning yakuniy javobi terma jamoalar tasnifida hal etildi.Messi Argentina terma jamoasini Kopa Amerika finaliga qadar boshlab bordi, biroq hal qiluvchi o‘yinda Argentina Chiliga imkoniyatni boy berdi.
Argentina terma jamoasi o‘zi ishtirok etadigan har qanday turnirning favoritlaridan biri hisoblanadi. Shunga qaramay, Messi ketma-ket uchta yirik finalda yengildi. Jahon Chempionatida Germaniya, Kopa Amerikada esa ketma-ket ikki bor Chili bosh sovrinni bermadi.
Krishtianu Ronaldu harakat qiladigan Portugaliya terma jamoasi esa Yevropada yetakchi hisoblanmaydi. Germaniya, Angliya, Ispaniya, Italiya, Fransiya kabi mamlakatlar oldida Portugaliya biroz keyinroq tilga olinadi.
Shunday bo‘lsa-da, Yevropa Chempionati aynan Portugaliyaning g‘alabasi bilan nihoyasiga yetdi. Krishtianu Ronaldu tarixda ilk bor termasi safida Yevropa chempioni degan nomga sazovor bo‘ldi.
Ikkita xalqaro musobaqadagi g‘oliblikdan keyin hammasi tushunarli bo‘lib qolgandi. Messining Ispaniya La Ligasi va mamlakat Kubogida muvaffaqiyat qozongani Yevropa Chempionati va Yevropa Chempionlar Ligasidagi g‘oliblik oldida ojiz qoldi.
Antuan Grizmann hali yosh, qolaversa “Atletiko” na La Ligada, na Chempionlar Ligasida g‘olib chiqdi. Yevropa Chempionati finalida ham Grizmann to‘p suradigan Fransiya Portugaliya oldida ojiz qoldi.
— Omar Momani (@omomani) December 12, 2016
Shunga qaramay, bir narsani unutmaslik kerak. Bu ikki futbolchini bir-biridan kuchliroq deb bo‘lmaydi. Buni isbotlashning o‘zi absurd. Messida “Oltin to‘p”lar soni 5 ta, Krishtianu esa ularni 4 taga yetkazib oldi. Shunday ekan, har ikki buyuk futbolchini tan olgan holda, ularning o‘yinidan birdek rohatlanish kishiga ko‘proq zavq beradi.
Jahon futboli esa mana shu yigitlarni ortda qoldirib ketadigan yangi qahramonni kutmoqda. Sizningcha u kim bo‘ladi?
[playbuzz-item playbuzz_url="https://www.playbuzz.com/muhrima10/messi-va-ronaldu-erasiga-qaysi-futbolchi-yakun-yasab-beradi"]
Izoh (0)