Italiya Vimpelcom va Hutchinson’ning aloqa operatori tashkil etish bo‘yicha 7,9 mlrd yevrolik kelishuvini ma’qulladi

Vimpelcom va Hutchinson Holdings kompaniyalarining Italiyadagi aktivlarini qo‘shma korxona — mobil aloqa operatorini tashkil etish yo‘li bilan birlashtirish tashabbusi Italiya iqtisodiy taraqqiyot vazirligi tomonidan to‘liq ma’qullandi. Bu haqda “TASS” xabar bermoqda.

Bunda gap Vimpelcom’ga tegishli Wind Telecomunicazioni va Hutchinson’ga tegishli 3 Italia operatorlarining birlashuvi haqida bormoqda. Kelishuv qiymati 7,9 milliard yevroga, qo‘shma korxonaning foydasi miqdori esa yiliga 700 million yevroga baholanmoqda.

“Vimpelcom va Hutchinson Italiya ma’muriyatining ushbu qarorini olqishlaydi. Mazkur qaror kelishuv yil oxirigacha yopilishini anglatadi”, — deyiladi Vimpelcom axborotida. Avvalroq kompaniyalarning kelishuvi Yevrokomissiya tomonidan ma’qullangan edi.

Vimpelcom — xalqaro telekommunikatsiya xoldinglaridan biridir. Xususan, u O‘zbekistonda “Bilayn” savdo belgisi ostida xizmat ko‘rsatuvchi aloqa operatorga egalik qiladi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.