Aleksandr Geynrix va Anzur Ismoilov o‘ynay olmaydigan Xitoyga qarshi bellashuv uchun Odil Ahmedov va Server Jeparov tayyor holatda

11-oktabr kuni Xitoy milliy terma jamoasiga qarshi bo‘lib o‘tadigan JCh—2018 saralash o‘yinida Odil Ahmedov va Server Jeparov maydonga tushishga tayyor. Bu haqda terma jamoa mashg‘ulotini kuzatib borgan “Championat.asia” nashri xabar berdi.

“Paxtakor” stadionida bo‘lib o‘tgan mashg‘ulotda o‘zbekistonliklar sardor va vitse-sardori umumiy guruhda shug‘ullangan.

Avvalroq Odil Ahmedov Yevropa Ligasida olgan jarohati sabab Eronga qarshi o‘yinni o‘tkazib yuborgan bo‘lsa, o‘sha uchrashuvning birinchi bo‘limida Server Jeparov jarohat olib, maydonni tark etgandi.

Hujumchi Aleksandr Geynrix va himoyachi Anzur Ismoilov esa sariq kartochkalari bois Xitoyga qarshi o‘yinni o‘tkazib yuboradi.