O‘zbekiston tarixida ushu bo‘yicha birinchi jahon chempionati oltini qo‘lga kiritildi

25-sentabrdan 3-oktabrga qadar Bolgariyaning Burgas shahrida ushu bo‘yicha o‘spirinlar o‘rtasidagi 6-jahon chempionati o‘tkazildi. Unda o‘zbekistonlik sportchilar medallarga ega bo‘ldi, deb xabar bermoqda “Gazeta.uz”.

Turnirda 53 mamlakatdan tashrif buyurgan 800 sportchi ishtirok etdi. Murabbiylar Dilshod Bozorov va Jamoliddin Salimjonov boshchiligidagi O‘zbekiston terma jamoasi 11 sportchidan tuzilgan edi. Ularning yetti nafari taolu, to‘rt nafari sanda yo‘nalishida ishtirok etdi.

Musobaqa yakunlariga ko‘ra O‘zbekiston vakillari oltin va bronza medallarini qo‘lga kiritdi. Tayoq bilan ijro etiladigan kompleksda eng yaxshi natijani ko‘rsatgan Darya Latishova birinchi o‘rinni qo‘lga kiritdi, Azizbek Isroilov esa sanda yo‘nalishida uchinchi bo‘ldi.

“Ushu qiziqarli, chiroyli va nazokatli sport turi bo‘lgani uchun uni tanlaganman. Jang san’atining ushbu turida akrobatik harakatlar va qurolga egalik qilish meni o‘ziga tortadi”, — dedi Latishova.