Deputatlar huquqiy bazani yanada takomillashtirishga qaratilgan qonun loyihalarini ko‘rib chiqdi
6-oktabr kuni O‘zbekiston Respublikasi Oliy Majlisi Qonunchilik palatasining navbatdagi majlisi bo‘lib o‘tdi. Bu haqda O‘zA xabar berdi.
Deputatlar jamiyat hayotining turli sohalarida amalga oshirilayotgan islohotlarni yanada chuqurlashtirishga, fuqarolarning huquqlari, erkinliklari va qonuniy manfaatlarini himoya qilishga qaratilgan bir qator qonun loyihalarini ko‘rib chiqdi.
Deputatlar fraksiyalar majlislarida, birinchi navbatda, O‘zbekiston Respublikasi Prezidenti vazifasini bajaruvchi Sh. Mirziyoyevning 2016-yil 5-oktabrda qabul qilingan “Tadbirkorlik faoliyatining jadal rivojlanishini ta’minlashga, xususiy mulkni har tomonlama himoya qilishga va ishbilarmonlik muhitini sifat jihatidan yaxshilashga doir qo‘shimcha chora-tadbirlar to‘g‘risida”gi farmonining ahamiyatiga alohida e’tibor qaratdi. Deputatlar mazkur hujjatni, normalarini va unda qo‘yilgan vazifalarni to‘liq qo‘llab-quvvatlagan holda, ushbu farmon kichik biznes va xususiy tadbirkorlikni yanada rivojlantirishga, xususiy mulkni himoya qilishning huquqiy mexanizmlarini va uning daxlsizligini mustahkamlashga, mamlakatda investitsiya va ishbilarmonlik muhitini yaxshilashga xizmat qilishini ta’kidlab o‘tdi.
Parlament a’zolari o‘z ishlarini “Keksalar, nogironlar va aholining boshqa ijtimoiy ehtiyojmand toifalariga ijtimoiy xizmatlar to‘g‘risida”gi O‘zbekiston Respublikasi qonuni loyihasini ikkinchi o‘qishda muhokama qilishdan boshladi. Qonun loyihasini ikkinchi o‘qishga tayyorlash chog‘ida qo‘mita tomonidan siyosiy partiyalar fraksiyalarining, shuningdek, ayrim deputatlarning fikr-mulohazalari va takliflariga katta e’tibor qaratildi. Batafsil muhokamadan so‘ng deputatlar ushbu qonunni qabul qildi.
So‘ngra deputatlar muhokamasiga “Kasaba uyushmalari, ularning huquqlari va faoliyatining kafolatlari to‘g‘risida”gi O‘zbekiston Respublikasi qonuniga o‘zgartishlar kiritishni nazarda tutuvchi qonun loyihasi taqdim etildi. Muhokamadan so‘ng deputatlar ushbu qonunni qabul qildi.
Deputatlar, shuningdek, jinoyatchilik holatining, undagi o‘zgarishlarning va huquqni qo‘llash amaliyotining tahlilini hisobga olgan holda firibgarlik va transport vositasini olib qochganlik uchun jinoiy javobgarlikni yanada takomillashtirishga qaratilgan “O‘zbekiston Respublikasining Jinoyat kodeksiga o‘zgartishlar kiritish to‘g‘risida”gi O‘zbekiston Respublikasi qonuni loyihasini ko‘rib chiqdi.
Majlis davomida parlament quyi palatasining a’zolari Oliy Majlis Qonunchilik palatasining vakolatiga kiradigan boshqa masalalarni ham ko‘rib chiqdi.
