“Manchester Yunayted” Joze Mourinyo bilan ishni Angliya Superkubogini yutishdan boshladi (video)

7-avgust kuni Angliya Premyer-Ligasida yangi mavsumni ochib beruvchi o‘yin — Angliya Superkubogi uchun o‘yin bo‘lib o‘tdi.

Superkubok uchun mamlakatning amaldagi chempioni “Lester” hamda Angliya Liga Kubogini qo‘lga kiritgan “Manchester Yunayted” klublari maydonga chiqib keldi.

Joze Mourinyoning birinchi rasmiy o‘yini final bilan boshlanib, uning shogirdlari mamlakat chempioni “Lester”ni mag‘lub etishga muvaffaq bo‘ldi — 2:1.

Hisob 32-daqiqada Jessi Lingard tomonidan ochilgan bo‘lsa, o‘tgan mavsum qahramoni sifatida yodda qolgan Jeymi Vardi 52-daqiqaga kelib muvozanatni tikladi. “Yunayted”ga Superkubokni taqdim etgan gol Zlatan Ibrahimovichga tegishli bo‘ldi. Shved hujumchisi 83-daqiqaga kelib o‘z nomini tabloga yozib qo‘ydi.

Angliya Superkubogi London. “Uembli” stadioni 7-avgust, yakshanba

“Lester” — “Manchester Yunayted” 1:2

“Lester”: Kasper Shmeyxel, Denni Simpson (Nampalis Mendi, 63), Robert Xut (Leonardo Ulyoa, 90), Uesli Morgan, Kristian Fuxs (Jeffri Shlupp, 80), Denni Drinkuoter, Mark Olbrayton (Ahmed Musa, 46), Endi King (Luis Ernandes, 63), Riyod Mahrez, Sindzi Okazaki (Demarey Grey, 46), Jeymi Vardi.

“Manchester Yunayted”: David De Xea, Antonio Valensiya, Deyli Blind, Erik Bertran Bayi, Lyuk Shou (Markos Roxo, 70), Maykl Kerrik (Ander Errera, 61), Maruan Fellaini, Antoni Marsyal, Ueyn Runi (Morgan Shnederlen, 87), Jessi Lingard, (Xuan Mata, 63 — Genrix Mxitaryan, 90+3), Zlatan Ibrahimovich.