Putin: WADA hisobotida tilga olinganlar vaqtinchalik lavozimlaridan chetlashtiriladi

Rossiya prezidenti Vladimir Putin Butunjahon aksildoping agentligi (WADA) mustaqil komissiyasining 2014-yilgi Sochi Olimpiadasida ro‘y bergan doping qallobligi yuzasidan tayyorlagan hisoboti xulosalariga izoh berib o‘tdi, deb xabar qiladi “Kommersant.ru”.

“Komissiya hisobotida to‘g‘ridan-to‘g‘ri ijrochilar sifatida tilga olingan mansabdor shaxslar lavozimlaridan vaqtinchalik chetlashtiriladi”, — deyiladi prezidentning Kreml rasmiy saytiga joylashtirilgan bayonotida.

“Ammo bu shaxslarning javobgarligi yuzasidan yakuniy qaror qabul qilish uchun WADA komissiyasidan to‘liq, xolis, faktlarga asoslangan axborot taqdim etishni so‘raymiz, toki u Rossiya huquq-tartibot va tergov organlarining taftishlarida inobatga olinsin. Ularning ishi, hech qanday shubhasiz, oxiriga yetkaziladi va tegishli choralar ko‘rilib, Rossiya qonunchiligi hamda zimmamizga olganimiz xalqaro majburiyatlarning buzilishiga chek qo‘yiladi”, — qo‘shimcha qildi u.

Shu bilan birga, bayonotda “doping janjallari” sportga siyosatni aralashtirishning o‘ziga xos yo‘li bo‘lib qolgani ta’kidlandi.

Eslatib o‘tamiz, bugun, 18-iyul kuni mustaqil komissiya rahbari Richard Maklaren Torontoda taftish yakunlariga bag‘ishlangan matbuot anjumani berdi. Hisobot xulosalari asosida WADA hujjatda tilga olingan rossiyalik amaldorlar, jumladan, sport vaziri Vitaliy Mutkoni lavozimidan ozod etishni hamda xalqaro sport musobaqalariga yaqinlashtirmaslikni tavsiya qildi.