Twitter’dagi millionlab akkauntlarning parollari o‘g‘irlandi

LeakedSource portali xakerlar Twitter’dagi akkauntlarga tegishli 33 million parolni o‘g‘irlaganliklarini bildirdi. 15 ta tasodifiy akkaunt bo‘yicha o‘tkazilgan tekshiruvlarning ko‘rsatishicha, xakerlar qo‘lga kiritgan bazadagi barcha parollar haqqoniydir, deb xabar bermoqda “Hi-Tech.Mail.ru”.

Portal manbalarining uqtirishicha, parollar ijtimoiy tarmoq xavfsizlik to‘siqlarini buzib kirish yo‘li bilan qo‘lga kiritilmagan — akkauntlar haqidagi axborot zararli dasturiy ta’minot yordamida to‘plangani ehtimoli katta. Bunday dastur brauzerlardan barcha axborotni to‘plab, xakerlarga yo‘llashi mumkin.

Bazadagi parollar shifrlanmagan shaklda taqdim etilgan, vaholanki, servis 2014-yildan ularni shifrlab saqlay boshlagan edi.

Akkauntlarga bog‘liq elektron manzillarning aksariyat qismi Rossiya servislariga tegishli ekanligi ta’kidlanmoqda. Bu ma’lumot o‘g‘irlovchi zararli dasturiy ta’minot Rossiyada tarqatilganidan dalolat beradi.