Ekvatorial Gvineya bilan o‘yin uchun chipta sotib olganlar Suriyaga qarshi rasmiy o‘yinga bepul kirishlari mumkin
O‘zbekiston Futbol Federatsiyasi Ekvatorial Gvineya terma jamoasiga qarshi bekor qilingan o‘yin uchun avvalroq chipta sotib olgan futbol muxlislariga qulaylik yaratishga qaror qildi. Unga ko‘ra, 2-iyun kungi o‘rtoqlik o‘yiniga chipta sotib olib ulgurgan tomoshabinlar, 2016-yilning 1-sentabr kuni bo‘lib o‘tadigan Suriyaga qarshi uchrashuvni stadiondan tomosha qilishlari mumkin.
Avvalroq O‘FF rasmiy sayti Ekvatorial Gvineya terma jamoasi bilan o‘yin uchun chipta xarid qilgan tomoshabinlar o‘z pullarini qanday qilib qaytarib olishlarini ma’lum qilgandi. Keyinroq esa muxlislarga tanlov imkoniyati ham taqdim etildi.
1-sentabr kuni JCh—2018 3-saralash bosqichining 1-tur uchrashuvi Toshkent shahrida bo‘lib o‘tadi va uning doirasida Suriya termasi O‘zbekiston milliy terma jamoasiga qarshi saf tortadi. “Bunyodkor” stadioni kassasiga Ekvatorial Gvineya bilan o‘yin uchun chiptani qaytib topshirishga ulgurmagan muxlislar, Suriya bilan o‘yin arafasida shu chiptani yangisiga almashtirib olishlari mumkin bo‘ladi.
O‘FF rasmiy sayti Suriya bilan o‘yin arafasida chiptalarni yangisiga qanday qilib almashtirish mumkinligini ma’lum qilishini ma’lum qildi. Ochiqlangan tomoni esa, chiptani yangisiga almashtirish jarayonida qo‘shimcha ma’lumotlar yoki xujjat talab qilinmaydi. Shunchaki eski chiptani taqdim etishning o‘zi kifoya.
Ekvatorial Gvineya bilan o‘yin uchun qaysi sektordan chipta harid qilingan bo‘lsa, xuddi shu sektor uchun chiqarilgan chipta egasiga tortiq etiladi. Unga qadar chipta pulini qaytarib olishni niyat qilgan muxlislar esa “Bunyodkor” kassalariga tashrif buyurib, o‘rnatilgan tartibda sarf etgan pullarini talab qilib olishlari mumkin bo‘ladi.
