Ўзбекистон Футбол Федерацияси Экваториал Гвинея терма жамоасига қарши бекор қилинган ўйин учун аввалроқ чипта сотиб олган футбол мухлисларига қулайлик яратишга қарор қилди. Унга кўра, 2 июнь кунги ўртоқлик ўйинига чипта сотиб олиб улгурган томошабинлар, 2016 йилнинг 1 сентябрь куни бўлиб ўтадиган Сурияга қарши учрашувни стадиондан томоша қилишлари мумкин.
Аввалроқ ЎФФ расмий сайти Экваториал Гвинея терма жамоаси билан ўйин учун чипта харид қилган томошабинлар ўз пулларини қандай қилиб қайтариб олишларини маълум қилганди. Кейинроқ эса мухлисларга танлов имконияти ҳам тақдим этилди.
1 сентябрь куни ЖЧ—2018 3-саралаш босқичининг 1-тур учрашуви Тошкент шаҳрида бўлиб ўтади ва унинг доирасида Сурия термаси Ўзбекистон миллий терма жамоасига қарши саф тортади. «Бунёдкор» стадиони кассасига Экваториал Гвинея билан ўйин учун чиптани қайтиб топширишга улгурмаган мухлислар, Сурия билан ўйин арафасида шу чиптани янгисига алмаштириб олишлари мумкин бўлади.
ЎФФ расмий сайти Сурия билан ўйин арафасида чипталарни янгисига қандай қилиб алмаштириш мумкинлигини маълум қилишини маълум қилди. Очиқланган томони эса, чиптани янгисига алмаштириш жараёнида қўшимча маълумотлар ёки хужжат талаб қилинмайди. Шунчаки эски чиптани тақдим этишнинг ўзи кифоя.
Экваториал Гвинея билан ўйин учун қайси сектордан чипта ҳарид қилинган бўлса, худди шу сектор учун чиқарилган чипта эгасига тортиқ этилади. Унга қадар чипта пулини қайтариб олишни ният қилган мухлислар эса «Бунёдкор» кассаларига ташриф буюриб, ўрнатилган тартибда сарф этган пулларини талаб қилиб олишлари мумкин бўлади.
Изоҳ (0)