Rossiya Turkiya rahbariyatidan Su-24 bombardimonchi samolyotining urib tushirilishi va uchuvchi Oleg Peshkovning halokati uchun uzr, tushuntirishlar va tovon puli kutmoqda. Bu haqda RF prezidenti matbuot kotibi Dmitriy Peskov aytib o‘tdi, deb xabar beradi “TASS”.
Turkiya prezidenti Rajab Toyyib Erdo‘g‘onning Moskva bilan muloqotni yo‘lga qo‘yish niyati izhor etilgan bayonotiga izoh berarkan, Peskov yana Su-24 masalasini o‘rtaga tashladi.
“O‘zimni boshqa davlat prezidentiga maslahat berishga haqli deb hisoblamayman, bu to‘g‘ri bo‘lmas edi. Lekin davlatimiz prezidentining tegishli bayonotlarini esga solib o‘tishni maqsadga muvofiq deb bilaman”, — dedi Kreml vakili.
“Aynan prezidentimiz uchuvchimiz o‘ldirilganidan bir necha kun o‘tib tajovuzkor va xoinona harakatlardan so‘ng Rossiya tomoni, tabiiyki, kechirim so‘ralishini, bo‘lib o‘tgan voqealar yuzasidan tushuntirishlar berilishini, urib tushirilgan samolyot uchun tovon puli to‘lanishini kutayotganini ta’kidlab o‘tgandi. Afsuski, Turkiya tomoni shu paytga qadar bu borada biror qadamni amalga oshirmadi”, — qo‘shimcha qildi u.
2015-yilning 24-noyabr kuni Rossiyaning Su-24 samolyoti Turkiya harbiylari tomonidan urib tushirilgan edi. Halokatga uchragan samolyotdan parashyutda tushayotgan uchuvchi Oleg Peshkov Suriya hududidagi jangarilar tarafidan otib o‘ldirilgan edi.
Izoh (0)