Iroqda to‘rt nafar terrorchi futbol bo‘yicha 2015/16-yilgi mavsumning Yevropa Chempionlar Ligasi finalini kuzatib borayotgan 12 nafar muxlisni otib o‘ldirdi. Bu haqda AS nashriga tayanib, “TASS” xabar bermoqda.
28-may, shanba kuni Yevropa Chempionlar Ligasi finalida Madridning ikki klubi – “Real” va “Atletiko” o‘zaro bahs olib bordi. Milandagi “San-Siro” stadionida bo‘lib o‘tgan uchrashuvning asosiy vaqtida 1:1 hisobi qayd etildi, penaltilar seriyasida esa “Real” 5:3 hisobida g‘alaba qozondi va 11-marta YeChL sohibiga aylandi.
Noxush hodisa Bag‘doddan 50 kilometr shimoli-sharqda joylashgan Baakuba shahrida ro‘y berdi. Qurollangan terrorchilar Chempionlar Ligasi finali namoyishi bo‘lib o‘tayotgan xonaga bostirib kirdi va ishqibozlarni o‘qqa tutdi. Dastlabki ma’lumotlarga ko‘ra, 12 kishi halok bo‘ldi, yana 8 nafari turli tan jarohatlari bilan shifoxonaga yetkazildi.
Iroq hukumatining taxminiga ko‘ra, mazkur terrorchilik harakati IShID ekstremistik guruhi tomonidan amalga oshirilgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)