O‘zbekistonlik taekvondochi Dmitriy Shokin Osiyo chempioni bo‘ldi

Kecha, 18-aprel kuni Filippin poytaxti Manila shahrida taekvondoning WTF yo‘nalishi bo‘yicha Osiyo chempionati boshlandi, deb xabar beradi O‘zbekiston Milliy olimpiya qo‘mitasi matbuot xizmati.

Ushbu musobaqada O‘zbekiston sharafini amaldagi jahon chempioni Dmitriy Shokin va jahon chempionati sovrindori Jasur Boyqo‘ziyev himoya qildi.

Taekvondoda eng og‘ir sanalgan +87 kilogramm vazn toifasida bahs yuritgan Dmitriy Shokin o‘z vaznida dunyoning tengsiz sportchisi ekanini amalda yana bir bora isbotladi va Osiyo chempionatining oltin medaliga sazovor bo‘ldi.

O‘zbekiston terma jamoasi yetakchilaridan biri Jasur Boyqo‘ziyev -87 kilogramm vazn toifasida Osiyo chempionatining bronza medali sovrindori bo‘ldi.

Qayd etish joiz, Manila shahridagi taekvondo bo‘yicha Osiyo chempionati 20-aprel, chorshanba kuni o‘z nihoyasiga yetadi.