Toshkent metropoliteni yo‘lovchilarini ham sarlavhadagi savol o‘ylantirgan bo‘lsa ajab emas. Chindan ham, nega metroda jamoat hojatxonasi yo‘q? VOT tahririyati bu savolga javob topishga harakat qildi.
Avvalo shuni ta’kidlash lozimki, metro avtobus, tramvay yoki yo‘nalishli taksi kabi jamoat transportining bir turi. Aytaylik, avtobusda shunday manzil yo‘qligidan shikoyat qilish hech kimning xayoliga kelmaydi. Qolaversa, metro yer ustidagi istalgan transport turidan tezroq harakatlanadi.
Toshkent metrosi bekatlari qurilishida jamoat hojatxonalari loyihalashtirilmagan. Kanalizatsiya, tozalash inshootlari qurilishining o‘zi ham muammoli jarayon, undan tashqari, poytaxt tozalash inshootlari, qoidaga ko‘ra, metro sathidan yuqorida joylashgan.
Toshkent metrosi strategik muhim obyekt hisoblanadi, yo‘lovchilar xavfsizligini ta’minlash, yong‘in va portlashga sabab bo‘ladigan buyumlar qoldirilishi oldini olish uchun ham jamoat hojatxonalari qurilishi mumkin emas. Sanitariya-gigiyena me’yorlarini ham unutmaslik lozim: tabiiy ventilyatsiya bo‘lmagan yopiq yerosti sharoitida hojatxonalardan doimiy foydalangan taqdirda bekatlardan yoqimsiz hid arimay qoladi.
Shu bilan birga, bolalar, qariya yoki homilador ayollar zarurat tug‘ilganda xizmat hojatxonasidan foydalanishi mumkin. Metro yo‘lovchilari shunday iltimos bilan murojaat etgan holatlar bo‘lgan.
Garchi xalqaro amaliyot yerostida jamoat hojatxonalari bo‘lishini istisno etmasa-da, yuqoridagi sabablarga ko‘ra Toshkent metrosida ularning paydo bo‘lishi maqsadga muvofiq emas. Buning o‘rniga bekatlar yaqinida jamoat hojatxonalari joylashtirilsa yoki biohojatxonalar bilan bog‘liq g‘oyalarni targ‘ib etilsa foydadan xoli bo‘lmasdi.
Izoh (0)