Futbol bo‘yicha O‘zbekiston Birinchi Ligasining 2016-yilgi futbol mavsumiga puxta tayyorgarlik ko‘rayotgan Samarqandning “Dinamo” jamoasi murabbiylar shtabida o‘zgarish yuz berdi, deb xabar qilmoqda klub matbuot xizmati.
Samarqand viloyati futbol federatsiyasi prezidenti taklifiga binoan, “Dinamo” klubiga bosh murabbiy etib Ilhom Sharipov tayinlandi. “Dinamo”dagi futbolchilik faoliyati bilan samarqandlik muxlislar yaqindan tanish bo‘lgan sobiq futbolchi O‘zbekiston terma jamoasi safida 1994-yilgi Osiyo o‘yinlari g‘olibi sanaladi. 48 yoshli samarqandlik mutaxassis bungacha “Paxtakor” klubida seleksioner-murabbiy sifatida faoliyat yuritib kelayotgan edi.
Klub rahbariyati tomonidan Ilhom Sharipov oldiga joriy mavsum yakunlariga ko‘ra, jamoani Oliy Ligaga olib chiqish va keyingi yildan Samarqandda barqaror va kurashuvchan jamoani yaratish vazifasi qo‘yildi. Sharipov klubda bosh menejer sifatida ham faoliyat yuritib, jamoada mahalliy yosh futbolchilar yetishib chiqishiga alohida e’tibor berishi tayinlandi. Murabbiylar shtabida unga yana ikki samarqandlik yosh mutaxassis Uchqun Qobilov va Rafael Balasanyan yordam beradi.
Izoh (0)