Bundesliga. 27-turning markaziy o‘yinida g‘olib chiqqan “Shalke” 4-o‘ringa ko‘tarildi
Futbol bo‘yicha Germaniya Bundesligasida 18-mart, juma kuni 27-tur bellashuvlari start oldi. Dastlabki kunga faqatgina bitta o‘yin tayin qilingan bo‘lib, unda Chempionlar Ligasi uchun kurash olib borayotgan ikki jamoa — “Shalke” va “Borussiya Myunxengladbax” o‘zaro to‘qnash keldi.
Birinchi bo‘limida hisob ochilmagan o‘yinning 59-daqiqasiga kelib mehmonlar himoyachisi Martin Xinteregger o‘z darvozasini ishg‘ol etib, mezbonlar ishini yengillashtirdi. 79-daqiqada “Borussiya”ning boshqa bir himoyachisi Andreas Kristensen mavsumdagi ikkinchi golini urib, hisobni tenglashtirdi.
Ammo Myunxengladbax klubi durang natijani ushlab qola olmadi. To‘rt daqiqadan keyin Leon Goretska “Shalke” uchun ikkinchi golni urib, jamoasining g‘alabasini ta’minladi — 2:1.
Mazkur jamoalarning Myunxengladbaxda kechgan o‘yinida “Borussiya” 3:1 hisobida g‘alaba qozongandi. 27 ta o‘yinda 44 ochko to‘plagan “Shalke” 4-o‘ringa ko‘tarilgan bo‘lsa, shuncha bellashuvda 42 ochkoga ega chiqqan “Borussiya” 5-o‘rinni egallab turibdi.
Germaniya Bundesligasi 27-tur uchrashuvi 18-mart, juma “Shalke” — “Borussiya Myunxengladbax” 2:1 Gollar: Xinteregger, 59, avtogol (1:0). Kristensen, 79 (1:1). Goretska, 83 (2:1).
Turning qolgan o‘yinlari 19—20-mart kunlari bo‘lib o‘tadi:
19-mart, shanba“Verder” — “Maynts”“Volfsburg” — “Darmshtadt”“Gamburg” — “Xoffenxaym”“Gerta” — “Ingolshtadt”“Kyoln” — “Bavariya”“Ayntraxt” — “Gannover”
20-mart, yakshanba“Shtutgart” — “Bayer”“Augsburg” — “Borussiya Dortmund”
